Buscando un Nissan March shinishi cu magreem blanco
ORANJESTAD (AAN): E prome atraco di Dia di Pasco, a socede apenas como 2 ora despues cu e strea di Bethlehem a cuminza briya.
Tabata Diasabra madruga pa 2:40 am, cu Central di Polis a dirigi patruya Noord na un adres na Boegoeroei relaciona cu un persona ta cana pafor di e cas, y e tin un arma di candela.
Central di Polis un poco despues a informa e unidad, cu na e lugar tin tres persona di cual un ta cabey rasta, y nan a subi den un Nissan March color shinishi cu bentana tinted y a aleha for di e lugar.
Na caminda pa e adres, na altura di e rotonde di Tanki Flip e unidad di polis a topa e Nissan March cu ta cuadra cu descripcion ta bayendo zuid. Polisnan a duna e chauffeur señal pa para y el a cumpli cu esaki. Polis a controla e chauffeur y alavez a listra den e auto, pero sin resultado.
Despues di esey, Polisnan a bay na e adres na Boegoeroei, y na yegada a bin nota cu ta trata aki di un cas no-habita. Un rato despues a yega cerca Polisnan un ciudadano den un Nissan March color roos.
El a mustra Polis riba un cas eybanda na Boegoeroei tambe, y a bisa nan pa bay eynan. Polis a bay y a resulta cu e casnan aki ta un Compleho di Apartamento.
Yegando na e Compleho di Apartamento, Polis a papia cu e ciudadano di inicial T. kende a splica e oficialnan hudicial ta den kico el a caba di pasa aden.
El a bisa cu tabata madruga y e ta sinta pafo ta usando su smartphone pa chat y check internet, y diripiente tres homber a baha for di un Nissan March shinishi, cu magreem blanco, y bentana tinted y bin riba dje.
Nan a yega rapidamente riba dje, cu pistol den man. Cu un pistol na su cabez, nan a forze pa bay para den skina.
Tambe T. a sigui declara cu un di e hombernan ta papia papiamento y tin cabey rasta largo y su postura ta delega. Su estatura ta di como 1.85 meter, e tin Tattoo na su man drechi, su cuero di curpa ta bruin y e tin pistol den su man.
E homber rasta aki a cuminza exigi placa, y tambe kier a haya yabi di e Nissan March roos. E hombernan aki tabatin nan cara full cubri, pues e no por a mira nan cara. E otro hombernan tambe tin color di cuero bruin, y tin estatura di como 1.65 y 1.70 meter. Uno di nan bisti na preto, tin postura delega y tin pistol den man. E otro tabatin shirt shinishi cu manga larga, ta un tiki gordito, pero no tin pistol.
E homber na shinishi a drenta den su cas pa busca cos di horta. Despues e hombernan a drenta e cas cune, y aki ta unda cu diripiente e ciudadano T. a haya chens di huy, y a drenta bay sconde den camber di su ruman muher, unda el a lock e porta. E hombernan a cuminza rek na e porta y a trata na forza esaki.
E ciudadano T. a core spierta su ruman muher for di soño y a bise pa e usa su celular pa yama Polis. Ora e hombernan a ripara cu Polis a worde yama, e tres elementonan a logra di huy.
Patruya a tuma tur e dato y tanto Atraco Team y Slachtoffer Hulp a worde solicita pa acudi na e Apartamento pa asisti esnan cu a pasa den momentonan di temor.
Si acaso abo tin informacion, ta kende tin un Nissan March shinishi cu magreem blanco, y ta wordo maneha pa un homber largo cabey rasta, bo por yama Tipline di Polis na 111-41. Ban pone e hendenan aki tras di trali prome cu Fin di Aña!
