ORANJESTAD (AAN) – Den conferencia di prensa di prensa pa update e informacion tocante e situacion di Covid-19 na Aruba, Comisario di Polis señora Irma Gordon, tambe a hiba palabra.
Comisario Gordon a expresa cu ta importante pa comunidad keda positivo, y pa yuda otro pa por sali di e situacion aki.
“Como ciudadanonan, mi ta suplica boso nan pa tene boso mes na e reglanan. Si nos ta tene nos mes na reglanan mi ta sigur cu nos lo sali afo mas lihe cu nos por”, señora Gordon a señala.
El a reitera cual ta e reglanan cu ya ta bon conoci. El a agrega cu e Task Force hunto cu Polis ora nan bay controla, y ora no cumpli cu e reglanan Polis lo actua.
Pesey, e suplica grandi pa un y tur atene na e reglanan pasobra asina y bayendo hunto na un bon direccion lo sali di e situacion.
Gordon a subraya cu ta hopi importante pa pueblo coopera cu autoridad, ora nan ta bay pa duna asistencia y bisa nan cu nan no ta atene na e reglanan, pa nan por cumpli cu esaki tambe. El a agrega cu por haya tur e reglanan den e site di OM, y tambe cuanto e boet ta bay sali. Asina, si un establecimento no ta cera 12’or madruga y ta keda mas largo habri, e boet ta varia entre mil cu cinco mil florin.
Na final el a expresa palabranan di gradicimento na su coleganan di KPA, cu ta pasando tambe den e retonan cu tin, pasobra tin di nan cu tin covid-19. Y esnan cu ta yudando e ta gradici nan cu nan a pone nan mes dilanti, pa yuda e coleganan cu no por, pa e trabao por sigui.
