ORANJESTAD (AAN): Riba Diaranson cu a pasa, durante oranan di atardi y anochi, polis di distrito di Santa Cruz a ehecuta un control intensivo di trafico.
Na diferente punto strategico, polisnan a para mas di 250 vehiculo di motor y un total di 108 boet a wordo parti.
E boetnan tabata pa diferente infraccion di trafico manera: (*) Velocidad halto. (*) Falta di documentonan valido (rijbewijs, keuringskaart, seguro). (*) No a uza faha di seguridad. (*) Maneha cu smartphone den man mientras ta na stuur.
Ademas di e infraccionnan di trafico, polis a haci detencion pa posesion di droga y a detene dos persona cu no tabatin nan documentonan legal pa permanece riba nos isla (status ilegal).
Cuerpo Policial ta informa cu e controlnan aki lo sigui den e dianan nos dilanti. Polis ta haci un apelacion na tur chauffeur pa percura pa bo tin bo documentonan valido y na man. Baha velocidad. Pone bo celular un banda.
Actua cu responsabilidad pa asina nos tur por yega cas sano y salvo. Un trafico sigur ta responsabilidad di nos tur.
