Dos arma di candela haya riba Diasabra
ORANJESTAD (AAN): E cantidad di arma cu keto bay den circulacion riba e isla, ta sigui di ta preocupante no djis pa Cuerpo Policial y pa Ministerio Publico, sino pa publico en general.
Tabata Diasabra atardi pa anochi, na momento cu e unidad di Polis di San Nicolas tabata haciendo un control preventivo, nan a duna e chauffeur di Nissan Sentra pa e stop. Esaki tabata den area di Pos Chikito, y e chauffeur a cumpli cu esey.
Polis a mira cu den e Nissan tin 3 persona. Ora cu Polis a haci control riba e vehiculo, a bin topa cu un arma di candela. Mesora nan a pasa pa detene e dos hende homber, y un hende muher pa e caso aki. E arma di candela automaticamente a wordo confisca, y lo ser pasa pa oficialnan forensico di BFTO. Aki lo bay check si acaso e arma di candela aki tabata envolvi den recien crimen.
Nan a manda busca vehiculo special pa transporta e tres personanan aki pa Warda di Polis na San Nicolas, unda nan a presenta dilanti Fiscal Auxiliar, kende a duna ordo pa nan wordo encarcela pendiente di investigacion.
Polis a confisca e Nissan Sentra tambe, y esaki a wordo hiba cu Takelwagen pa Warda di Polis, unda lo haci un investigacion riba dje tambe.
Vocero policial suplente Lilian Rasmijn a confirma cu esey tabata e di dos arma di candela cu a wordo confisca riba Diasabra!
El a bisa cu e prome caso a socede Diasabra marduga, na momento cu un oficial policial na civil cu wowo skerpi a mira un homber cu un arma di candela den su poder, na altura di un Snacktruck na Playa. Mesora el a informa Central di Polis di e situacion peligroso aki.
Diferente unidad di Polis a mobiliza mesora, y na altura di Rotonde Las Americas dilanti Cas di Cultura, nan a topa cu e persona sospechoso, y a detene na un forma tactico.
Den e investigacion ey di marduga, a confisca e Arma di Candela. Tambe autoridad a confisca dos auto cu tabata eynan staciona.
Pues cu bon control asina, Cuerpo Policial ta yudando pa haci Aruba mas safe, dia pa dia.
