Polis a detene señora burachi cu a ocasiona accident

ORANJESTAD (AAN): Tabata Dialuna anochi, cu Central di Polis a manda un agente policial encarga cu Trafico,

pa bay check un caso den Driemasterstraat.  Pasobra un simple accident unda un auto a dal tras di otro, a cambia di esencia ora cu a mira cu un di e personanan tin caracteristica di ta bao influencia.

   E accident su investigacion a cuminza prome cu e profesionalnan di Forensys cu a bay check e accident aki den Driemasterstraat cerca cu e cruzada Venezuelastraat.  Pa un accident asina di dal tras di otro y unda no tin hende herida, ta e personal di Forensys mes por atende.

   E accident ta debi cu e chauffeur femenino di un Toyota Corolla color shinishi cu number A-81950 no a regla su velocidad na tempo, y a bay dal tras di un Chevrolet Spark color blauw cu number A-29462.

   Personal di Forensys papiando cu e chauffeur femenino di e Corolla, a nota cu e tin caracteristica di ta bao influencia.  Pesey segun protocol, e ora tin di yama Polis como cu e situacion di accident a cambia completamente.

   Polis di Trafico a yega y a atende cu e chauffeur aki, y e tambe mesora a ripara caracteristica di ta hende bao influencia.  E ora a pidi cooperacion di e chauffeur femenino pa e haci test di supla, y el a duna OK.  Pero ora di supla den e aparato di AlcoSensor, esaki a duna un cifra di µg/l cu ta hopi mas halto cu e limite legal di Aruba.

   Pesey mesora Polis a pone boei na su mannan, y indica na dje cu e ta bao aresto.  A manda busca vehiculo di transporte cu a bay cu ne Warda di Polis, pa e ser presenta dilanti un Fiscal Auxiliar.  Hopi biaha debi cu e chauffeur ta burachi, esey kiermeen cu su Aseguro lo no cubri e gasto di daño ocasiona door di dje tampoco.  Pues aki su cartera tambe lo bay haya un deuk aden pa drecha auto kibra di otro hende.