Polis a defende su mes y a tira riba homber agresivo

Caso fatal na Pos Abao

• Bisiñanan a tende minimo 3 tiro
• E persona ta un pashent di Respaldo 

ORANJESTAD (AAN): Tabata Diamars atardi alrededor di 3:10 pm, cu Central di Polis a manda diferente patruya policial rumbo pa Pos Abao, como cu a drenta yamada di e asina yama ‘FACT Team’ di Respaldo, cu ta solicita asistencia urgente pa atende un pashent na e cas Pos Abao 36-A.  E cas aki ta situa den area como 260 meter patras di Eagle Bowling.

   E pashent no tabata coopera cu FACT Team y a pidi sosten di polis y ambulance na e adres.  Ta parce cu Polis sa di e persona, y den pasado na varios ocasion a yega di bay pa asina trankiliza e persona.

   Sinembargo riba Diamars atardi, e situacion tabata mas extremo y nan a bin haya e homber ta zwaai un machete rond y cu actitud extremadamente agresivo.  Dado momento e situacion a menaza di sali for di man, no obstante agentenan tratando di papia y trankiliza e persona.  E tabata zwaai su mokete y e machete rond, y Polisnan a keda mantene distancia.

   Na varios ocasion polis na e lugar a trata na calma e pacient y a dune orden pa e pone e machete abao.  Pero e no tabata haci oido pa e ordo aki.  Mirando e situacion precario y cu autoridadnan a cuminza teme pa nan mesun bida, y diripiente e persona a cuminza acelera su paso den direccion di Polis, y agente a haye ta core saca arma y los tiro riba e persona.  Bisiñanan a declara na prensa cu nan mes a tende 3 of mas tiro.

   Bula riba Polis cu cuchiu: Vocero di Polis, Liliana Rasmijn a declara cu mirando e situacion serio entre e agente policial y e pashent, e Polis a haye ta saca su arma reglamentario y a los tiro na unda e pashent a ricibi impacto di bala

   Hendenan a bisa cu e persona agresivo aki, a bula bay riba un Polis, pues cu rapidez.  E agente a haye na forma relampago ta saca su arma reglamentario, y tira pa defende su mes.

   Un rato despues cu tiro a cay, mesora patruya a solicita pa Ambulance cu maximo urgencia.  Como cu tin un post di Ambulance hopi cerca den Schotlandstraat, mesora un unidad a yega.  Paramediconan a core check e persona, y como cu Servicio di Emergencia di Hospital ta relativamente hopi cerca, a dicidi na bay cu e persona mesora pa cuido avanza.  A compronde cu ora nan a bay cu ne, e tabata halando rosea riba brancard.

    Via LandsRecherche: Central di Polis a wordo notifica loke a socede, y mesora a dicidi pone tur autoridad competente na altura.  Pesey na e lugar a mira Hefe di Polis Distrito Oranjestad tambe yega pa pone su mes na altura.  Na e adres por a mira un funcionario/representante di Respaldo presente.  No ta conoci si acaso e ta esun cu na comienso a solicita presencia di Polis pa yuda.

   Team forensico di BFTO tambe a yega pa asina colecta dato pa sostene funcionarionan hudicial di LandsRecherche cu a start un investigacion.  Bureau Slachtofferhulp tambe a yega na e adres.

   Bisiñanan a indica na prensa cu e homber ta conoci den e area pa su actitud hopi agresivo.

   El a fayece na Hospital: Lamentabelmente un rato despues ta drenta informacion cu e victima a fayece. Ta trata di e hende homber Frank Miguel Henriquez, naci na Aruba dia 30 di Augustus 1989, pues tin 36 aña di edad.

   E caso ta bao di investigacion y den man di Landsrecherche pa motibo cu ta trata di un funcionario policial.

   Na famia di e fayecido, DIARIO y Cuerpo Policial Aruba ta manda palabra di condolencia.