Peatonnan y tambe chauffeurnan tin di paga mas tino riba trafico

Liliana Rasmijn di Cuerpo Policial

ORANJESTAD (AAN): Riba Diahuebs cu a observa Dia Internacional di Garoti Blanco, Fundacion FAVI a tene un demostracion di e uzo di e garoti aki, riba e zebrapad dilanti edificio di Parlamento.

   Esaki a socede bao supervision di Liliana Rasmijn di Cuerpo Policial.  El a indica cu riba Dia di Garoti Blanco strepi Cora, nan ta keda haci un enfasis riba automobilistanan pa promove un trafico safe, y concientiza.  FAVI tambe ta sigui yuda concientiza comportamento di chauffeurnan, y riba fecha di 15 nan ta haci e training di cruza caya cu e Garoti Blanco.

   E training tambe ta valido pa e clientenan cu tin discapacidad di vision, y nan ta siña con ta yega na rand di un acera, con ta banda di caminda y cu nan kier cruza nan ta haya sa kico pa haci.  E ta un momento tambe pa corda esnan tras di stuur cu ora di mira e Garoti Blanco, pa nan tene cuenta cu e persona cu tin problema di bista para eynan.

   Asina bo mira un persona cu Garoti Blanco cu Strepi Cora para banda di caminda, y e ta duna indicacion cu e ta bay cruza... e ora abo como chauffeur tin di para pe, y pita bo auto un rato y asina e ta haya e señal y por cruza caminda trankil y safe.

   Rasmijn a indica cu e Garoti Blanco cu Strepi Cora ya caba ta un señal pa tur chauffeur, cu e persona ta visualmente incapacita.  Pues bo mester tene extra cuenta y mester sa tambe con bo por yud’e pa e forma parti di trafico.  Asina bo mire banda di caminda cu su Garoti, abo como chauffeur ta para, pita, y asina e por sa cu e por cruza safe.

   Trafico safe: Den e entrevista cu Liliana Rasmijn, a puntre riba e hecho cu ainda ta mira hendenan ta core cu smartphone den man, y hopi otro distraccion.  Kico lo bay haci den e casonan ey den futuro cercano

   Segun e vocero di Polis, e palabra importante aki ta ‘concientiza’.  No djis concientiza automobilistanan riba core duro, core burachi, atene na reglanan, core cu smartphone, pero inclui tambe esnan visualmente incapacita den campañanan pa asina yuda pusha e informacion aki cerca esnan tras di stuur.

   “Mi ta kere cu nos di Cuerpo Policial lo bay tum’e den nos prevencion cu nos ta haci pa cu trafico, y asina concientiza pueblo pa asina tur hende traha hunto cu demas instancianan pa promove e aspecto y tur hende haya sa kico pa haci ora nan mira un persona banda di caminda cu e Garoti Blanco cu Strepi Cora,” Rasmijn a declara.

   Ultimo lunanan tin hopi accident unda peaton ta wordo gedal pa auto.  Hopi biaha e ta socede anochi, y realidad ta cu no ta tur caminda tin bon iluminacion pa asina automobilistanan por mira peaton ta cruzando.  Pero Liliana Rasmijn ta opina cu si chauffeur ta core cu velocidad normal manera ley ta indica, cu bo por para na tempo y no ocasiona daño asina.

   Comportacion di peaton: Pero e peaton tambe tin di cuminza uza mas e Zebrapad, anochi no bisti paña demasiado scur, pasobra bo ta cruzando sin cu bo ta visibel pa e chauffeur cu ta yegando cerca.

   Liliana Rasmijn a bolbe enfatiza pa e automobilista cu dal un hende, pa e keda na e lugar!  Ta inaceptabel cu bo ta bandona e lugar, pues haciendo e caso bira Hit & Run.

   “Cu bo ta fout of no, bo ta keda na e lugar di accident, brinda yudansa na e persona sea ta herida of no, y core yama Polis pa raporta e caso, y pidi pa manda Ambulance,” vocero Policial a bisa.

   Aña pasa e cantidad di morto den trafico na Aruba tabata 10 victima, y aworaki cu ta apenas na luna di October 2026, ya caba e cantidad di victima fatal a yega na 14 persona.

   Automobilistanan mester realiza, cu e accident ey no ta cambia e bida di e persona so, e famia cu a perdi su ser keri, pero abo tambe, cu ta esun cu a ocasiona e accident, pa bo tambe situacion ta cambia!  Kizas bo ta wordo libera door di Polis, pero bo tin di sinta na cas warda te dia cu e caso presenta dilanti Hues.

   Recomendacion di Liliana Rasmijn ta pa comunidad core cu velocidad normal, pone bo smartphone un banda, bisti bo safety belt, paga tino riba trafico, y maneha un tiki mas cordial.  Fin di Aña ta yegando, trafico ta druk y hendenan ta perde pasenshi y ta busca forma ilegal pa short-cut.

   Aruba awor tin riba di 100.000 auto y vehiculo cu plachi di number.  Mihor pues bo sali na ora, y si bo ta laat, acepta cu bo ta laat.  No purba di rush y ocasiona accident cu ta bay lamenta pa resto di bo bida.