ORANJESTAD (AAN): Diasabra marduga banda di 12:50 am, alarma a wordo bati cu un hende a caba di bira victima di atraco riba caminda di Madiki pa Bushiri, na altura di Grand Ocean Supermarket.
Polis di Playa a yega na e establecimento aki cu ta keda net un tiki pazuid di rotonde di Watty Vos Boulevard na Bushiri. E marduga ey e negoshi ta cera di basta ora caba.
Den e area, Polis a bin topa cu e ciudadano di inicial F., y e dama di inicial F. Nan a declara cu nan tabata para e anochi laat ey banda di e palo grandi di kwihi pazuid di e negoshi. E area aki ta conoci como ‘Parke Amigo’. Nan auto Chevrolet Camaro color preto ta staciona eynan na Parke Amigo, y nan tabata pafo di auto ta combersando cu otro.
Diripiente nan a ripara cu un grupo di hoben a sali for di e mondi net pabao di e Supermarket, y a trata di comete atraco riba nan. E grupo di hoben a bin tur bisti na preto, y cada uno tabatin un capuchon riba nan cabez.
Tres di e hobennan tabatin un arma di candela den nan man, y uno tabatin un puñal den nan poder.
E ciudadano F. a bisa cu el a keda defende su mes. Durante cu e ciudadano F. tabata pushando e hobennan aki, el a mira cu un di e hobennan a bay habri e porta di pasahero di su Chevrolet Camaro, y a cuminza reboltea tur cos paden.
Nan a sigui actua contra e hobennan aki, y na final e hobennan aki a ranca careda sali rumbo pa Bushiri Complex bek.
E ciudadano F. a bisa Polis, cu e hobennan aki no a logra di bay cu nada. Polis a pone Atraco Team na altura cu a bay na e lugar pa asina tuma e keho, y ta bay investiga esaki.
