Otro caso di ‘Hit & Run’ cu a bay laga peaton gravemente herida na San Nicolas

Victima ta hospitaliza den situacion critico

• Chauffeur a entrega su mes Diabierna mainta 

ORANJESTAD (AAN): Tabata Diahuebs alrededor di 9:20 pm, Central di Polis a ricibi yamadanan, indicando cu riba e caminda net dilanti Warda di Polis na San Nicolas, un auto a caba di dal un peaton cruzando caminda.

   Ta trata aki e caminda Bernhardstraat, entre e pida di KFC y Burger King, net dilanti Warda di Polis.  Mesora agentenan di Polis a mobilisa, y a bay mira e situacion.  Abao benta nan a bin topa cu un hende homber riba caminda y e no tabata reacciona.  E auto of vehiculo cu a dal’e si ya no tey mas.  Pues ta un otro caso di Hit & Run.

   Mesora e oficialnan a core pidi pa Ambulance di ImSan yega cu maximo urgencia na e lugar di sucedido, mientras cu dos unidad di Polis a core cera e pida caminda aki di 75 meter.

   Na yegada di Ambulance, Paramediconan a atende cu e victima y nan a bin nota cu e ta basta grave.  Toch a logra stabilize prome cu a his’e den nan vehiculo, y a indica cu nan lo bay rumbo pa Servicio di Emergencia di Hospital.

   Mirando su condicion serio, Cuerpo Policial a duna cooperacion, y di San Nicolas pa Hospital, diferente unidad di Polis a coopera pa asina cera varios cruzada y caminda, pa e unidad por haya espacio liber pa yega mas rapido, pa ricibi tratamento medico urgente.

   Mientras tanto, a manda busca Specialista di Trafico, hunto cu team forensico di BFTO pa haci investigacion.

    Bureau Slachtofferhulp tambe a wordo poni na altura pa brinda e sosten.

    Diahuebs anochi, vocero Liliana Rasmijn di Cuerpo Policial a indica cu e situacion di e victima ta hopi critico, y ta pidi comunidad pa haci oracion pa e victima.

   E mesun anochi, a core haci un suplica na e chauffeur cu a huy despues di a dal e peaton, pa e bay entrega su mes. E tin di asumi su responsabilidad pa loke el a haci.  Hamas bay laga un hende benta abao pa su cuenta, corda cu e ta un ser humano.

   Sinembargo Diabierna mainta, un persona masculino a presenta na Warda di Polis na San Nicolas, y el a identifica su mes na Wachtcommandant, cu e ta e chauffeur cu a ocasiona e Hit & Run.

   Mesora Polisnan a pasa e homber aki pa Departamento di Trafico pa atende cu e investigacion.  Segun Polis, riba Diabierna mainta keto bay e situacion di e victima ta critico.

   Toch Polis ta pidi cualkier hende cu por a mira e accident socede, pa yama y duna detaye na autoridad.  Bo por haci esaki via e Tipline di Polis, cu ta 111-41 y corda cu bo por keda anonimo.