ORANJESTAD (AAN): Helicopter di Polis a lanta vuelo Diaranson atardi banda di 2:00 pm, como cu Cuerpo Policial y tambe Guardacosta di Caribe Hulandes
a haya notificacion di Park Rangers di Fundacion Parke Nacional Aruba (FPNA), cu un boto cu droga a spula y kibra na werki riba e barancanan banda di Cura di Tortuga, conoci den pueblo como ‘Conchi’.
Pero e momento ey, ta e resto di speedboat tipo Go-Fast so por a mira atras, y ya caba el a bolter y a keda spula y dal contra barancanan, y no tin hende mas presente. Sea nan a subi tera y bay laga tur cos atras.
Tur contenido di e boto a bolter y cay den lama y tabata spulando, incluyendo combustible cu tabata produci un holor fuerte. Entre e cargamento tabatin varios bulto di droga. Un fuente a indica cu a haya 6 bulto yena cu droga.
Polisnan cu a yega eynan, a compronde cu e tripulantenan aki a bin for di un viahe largo, esta cu tabatin extra baki special pa pone gasolin aden. Pero como cu no a topa ningun hende, sea nan a subi tera na forma safe y a busca lugar di sconde den Parke Arikok. Of kizas nan lo a bolter riba lama caba y ta naufrago.
Guardacosta a keda busca riba lama pa check si por haya hende ta drief. Polisnan tambe tabata buscando abao den varios skina di Parke Arikok.
Un Pickup 4x4 di Polis cu a yega eynan, a yuda recoge tur e bultonan di droga, y demas pertenencia cu a cay den lama, pa e investigacion.
Helicopter di Polis a yuda busca un tiki pero no a mira nada riba lama. Pero despues di esey, e Helicopter a keda busca den un zona di como 1.100 meter cuadra, tin biaha bulando basta abao pa mira si por mira hende ilegal scondi bao di cadushi y barancanan. Banda di 3:00 pm despues di no a localiza nada, e Helicopter a regresa su base.
Pero net ora cu el a caba di ateriza, e informe a drenta cu a mira hendenan sospechoso cerca di Sero di Arikok. Pues kizas e ilegalnan a sconde ora di tende Helicopter bulando. Inmediatamente a dicidi pa laga e Helicopter lanta vuelo atrobe, y a bay check specificamente e parti panort di e sero, y despues banda pariba. Sinembargo no a mira nada. Tambe a check e parti pazuid di e Sero Arikok, net cerca di e Visitor Center di Parke.
Posibilidad ta grandi cu e Go-Fast aki a bin for di La Guajira (Colombia) pa drop e droga aki na Aruba, pa asina e por haya caminda habri pa por yega Europa.
