ORANJESTAD (AAN): E siman aki e sorteo di Lotto 5 a yega na jackpot di 1.000.000 Florin. Pero e sorteo aki lo ta Diasabra anochi, sinembargo asina mes un persona a dicidi na atraca un oficina di bende loteria.
Diahuebs anochi alrededor di 7:30 pm, Central di Polis a worde notifica di un atraco riba ‘U Win Lottery’ situa na Koningstraat na Playa.
E prome unidad di Polis di Playa cu a yega, a papia cu e bendedora, kende a splica cu diripiente nan a keda sorprendi pa un homber hoben cu a drenta e negoshi cu arma di candela, y a exigi tur placa.
E ta calcula cu e atracador tin 19 of 20 aña di edad, y e tabata papia bon Papiamento. E suheto tabata bisti full na preto, cu tapaboca blanco na cara, y capuchon riba cabez.
El a pasa man na como 900 Florin cu tabatin den e oficina di loteria. Vocero Policial Liliana Rasmijn a indica, cu despues di esey e homber a rek un careda na pia bay direccion di Rancho.
Polis hunto cu Atraco Team a yega pa asina tuma tur detaye. Como cu e señora a keda basta spanta, a solicita yudanza di Slachtofferhulp tambe. Como cu lo por tin vingerprint, a busca oficialnan forensico di BFTO pa bin haci investigacion.
Esnan cu por a mira algo di e atraco aki, of a nota hende coriendo e momentonan ey, por yama Tipline di Polis na 111-41 pa asina duna detaye y ban yuda gara atracadornan.
