Ladron di auto a maltrata doño den caso di persecusion riba caminda

 ORANJESTAD (AAN): Diadomingo anochi un pareha cu a bira victima di ladronicia, a cuminsa cu un persecusion tras di nan propio auto compacto Nissan March cu sea recien of e mesun dia a wordo horta for di nan.

   Ta asina cu na Aruba, hopi doño di autonan horta ta core rond pa mira si nan por topa cu nan propiedad ta coriendo rond cu ladron aden.

   Polisnan di Playa cu urgencia a bay na area di WVB na rotonde di Cumana, y aki riba e caminda a bin topa cu dos Nissan March net nan ta prepara pa subi e viaducto di Meiveld.  Uno di nan ta esun horta, y e persona cu a bati alarma na Polis, tabata coriendo su tras den un otro Nissan March.

   E doñonan original di e March horta a conta polis loke a caba di sosode. Parce cu e ladron a enfrenta e doñonan di e March y lo a herida un cabayero basta bon den cara, y esaki tabata sangra profusamente.

   Un dama cu tabata cu e cabayero herida, tambe a bringa cu e ladron, prome cu esaki a core bay direccion ex-Codemsa na Cumana, lagando un slof di Adidas atras. Polis a confisca esaki y tambe tas cu lo ta pertenece na e ladron di auto. 

   Ariba e tas, por a mira potret di un mucha, probablemente yiu di e ladron hoben.

   Otro agentenan tabata busca cerca di e jogging track a lo largo di WVB y ex Codemsa pero sin resultado.

  Despues cu takelwagen a presenta y tur hende a bay di e lugar, un automobilista a capta momento cu e ladron a subi Watty Vos Boulevard, altura di e viaduct di Cumana y drenta un auto. Polis tin e datonan.

   E ladron ta hoben, cabey largo wanta y tabata den un short. Polis a worde avisa.