Altocomisario di Polis, Sr. Ramon Arnhem
ORANJESTAD (AAN): E ultimo añanan e capacidad di Cuerpo Policial Aruba a baha drasticamente. Esaki nifica falta hopi personal pa carga e cuerpo. Na e momentonan aki KPA tin un scarcedad di 50% di su capacidad. E gran parti di scarcedad di personal ta e parti operacional cu ta 40% y segun Alto Comisario di Polis, Sr. Ramon Arnhem, esaki ta hopi preocupante.
E desaroyo serio aki tin consecuencia grandi pa e parti operacional y e bienestar di e Polisnan.
Alto Comisario Arnhem a enfatiza cu “mi a ripara cu mi hendenan ta cansa pero HOPI CANSA! Esaki pasobra nan ta traha mas cu 16 ora pa dia. Mi a tuma nota cu nos ta cabando cu nos polisnan pasobra nos ta exigi hopi di nan” y e desaroyo serio aki ta causa pa preocupacion.
Mescos cu e seguridad di comunidad ta central. Alto Comisario tin e coleganan bienestar como su prioridad.
Ta solamente e momento cu nos polisnan ta bon di salud, físicamente y mentalmente nos por garantisa e seguridad en general.
Ta importante pa re-evalua e tareanan cu KPA tin. No pasobra cu nan kier pero pasobra no por otro. Hunto cu Minister di Husticia y Procurador General, lo defini cada tarea pa por mira kico por y kico no por y sin cu esaki ta bay a costo di e salud di cada colega di Cuerpo Policial di Aruba pasobra esaki ta inaceptabel!
Apesar cu e problema di capacidad Cuerpo Policial Aruba lo sigui garantisa e seguridad di nos Pueblo.
Arnhem a finaliza, "ami como Alto Comisario ta hopi agradecido pa e esfuerso y dedicacion di cada colega pa haci cu Pais Aruba ta safe. Nos comunidad por sigui conta cu e sosten di Cuerpo Policial Aruba".
