Vocero di KPA, Liliana Rasmijn cu relato amplio:
ORANJESTAD (AAN) — Cuerpo Policial ta cla pa haci control durante e dos ultimo simannan di carnaval. Asina e Vocero di KPA a bisa den entrevista cu DIARIO unda el a relata kico e control ta encera e fin di siman di siman aki.
El a duna di conoce cu cada distrito tin nan draaiboek y a menciona cu for di trempan nan ta sinta na mesa cu SMAC na unda nan ta delibera si tin cambio of no tin, cuanto grupo y cuanto participante, locual ta hopi importante, pa asina esnan cu ta traha e draaiboek, por sa cuanto polis ta wordo poni riba pia.
Kiermen cu cada actividad tin su draaiboek, y nan tin timeframe tambe cu ta wordo publica, specialmente pa esnan no kier sali trempan pa ta riba e ruta, pa nan sa exactamente na unda e cabes di e parada ta.
El a splica kico ta 'timeframe', pasobra tin biaha tin hende ta bruha. E ta e puntonan caminda polis ta para, e cruzadanan, nan ta para y pone e nomber di e caya y cuant’or mas of menos ta bay ta. Esey ta yuda pa e hendenan por goza di e carnaval pero tambe pa e parada yega na tempo.
Pa loke ta trata e fin di siman aki, el a papia tocante e actividad yama Jouvert Morning awe, cu ta cuminza forma pa 3’or y lo sali mas tarda, 4’or marduga.
Ta hopi importante pa hendenan tene na cuenta, pasobra na Jouvert hopi hende ta laga nan curpa bay los un tiki, nan ta bebe un tiki, pero mester bisa cu control di polis ta bay tey.
Liliana Rasmijn a informa tambe, cu e trafico cu ta bay e parti paden e Fiscal ta bay tey pa test e chofernan bao influencia, y lo testnan un biaha mas riba e machine grandi na unda tin consecuencia. Tin hende ta lubida cu e persona por perde su rijbewijs e momento ey, e tin cu presenta dilanti Huez y tambe e tin un multa pa paga. Pues, si bo ta un persona cu mester di bo rijbewijs pa trabao, pa hiba bo yiunan scol, bo tin cu corda di e consecuencianan.
Despues di esey lo sigui awenochi cu Lighting Parade cu ta poni pa sali exactamente 8’or y pa caba, pa 2 or di marduga. E ruta ta keda mescos.
Tambe ta bay tin un timeframe cu ta wordo publica tambe. Despues di esaki ta bay pa e parada di mucha na San Nicolas; e ruta ta keda mescos cu tur aña. Kiermen, no tin cambio y e ta poni pa yega 6’or na Joe Laveist y despues e gruponan cu kier por bay na Carnival Village unda por kima e Momito.
