Kendo a bira prome victima fatal di trafico pa 2021

ORANJESTAD (AAN): Un accident grave a keda registra Diabierna anochi pa mas o menos 7:20 pm. Esey tabata e momento cu Central di Polis a worde notifica di un accidente basta fuerte entre un Toyota Van blanco numera A-9947 y un

brommer na e crusada Lloyd G. Smith Boulevard y Adriaan Lacle Boulevard.

   E Toyota Van tabata bayendo pariba riba Lloyd G. Smith Boulevard y na e cruzada aki a sortea pa bira na su man robez.  E chauffeur a tuma e birada na forma inexplicable, como cu un brommer tabata bin for direccion contrario bayendo pabao.

   E acto inespera aki di e chauffeur di e Van, a pone cu e motorcycle a bay dal directo contra e Van, kibrando e front, y kizas e curpa di e motociclista a bay dal contra e windshield tambe.  Esaki a kibra e momentum cu e brommer y e motociclista ta bin cune, y nan dos a bay cay riba e tereno unda semper Kiwanis Club ta pone su Tent pa recauda fondo durante Carnaval.

   E prome unidad di Polis cu a yega na e lugar, mesora a ripara e gravedad di e accident, y tambe di e motociclista benta eybao, y a solicita pa Ambulans yega cu maximo urgencia.

   No menos cu dos Unidad di Ambulans a yega na e lugar, y aki a check su pulso y tambe haci lo posible, pero ya e victima no tabata reacciona mas.  Pues e Paramediconan a indica cu no por haci nada mas pa e hoben, y a pidi Centro di Alarma pa laga un Docter bin na e lugar.

   Esaki a wordo haci tambe, y Docter a yega pa check e situacion, y pa 8:05 pm, Dr. Texier a constata morto di Kevin Michael Dania, mihor conoci como ‘Kendo’.  Kendo a nace dia 5 Januari 2000 na Aruba, pues tin 21 aña di edad.

   Polis a yama Specialista di Trafico pa bin na e lugar, y tambe a laga funcionarionan forensico di BFTO yega eynan.  Como cu hopi amigo y famia di Kendo a yega na e lugar y tabata reina tristeza enorme, a pidi yudanza tambe di Slachtofferhulp como sosten.

   Vocero Policial Liliana Rasmijn a confirma na DIARIO cu Kendo a bira e prome victima fatal di trafico pa 2021.

   Kendo Dania ta un persona cu tin amor grandi pa e mundo di motorcycling, y como un persona cu semper a sigui e deporte di biking di cerca.  Su amigonan ta bolbe haci un suplica na chauffeurnan, pa ora bo bay sorteer, of ora bo ta saliendo di un caminda, por fabor dal un doble-bista prome cu bo djis hisa y bira bo stuur y cambia di direccion of drenta un caminda.

   Kendo Dania a bay laga su pareha y tambe un baby atras, como tambe su demas famia.  Na nan tur, DIARIO ta expresa su mas profundo palabranan di condolencia.