ORANJESTAD (AAN): Diabierna atardi, Cuerpo di Polis a informa cu despues di un investigacion di varios luna, dirigi riba 'afpersing' (blackmail) y participacion den un organisacion criminal.
Recherche di Santa Cruz (DAR-4) den colaboracion cu Fiscal di Ministerio Publico y Huez Comisario, bureau Financiele Onderzoeken di KPA (BFO) y Digitale Recherche di KPA a realisa dia 2 y 3 di maart 2023, 4 detencion y a haci entrada hudicial na 4 adres.
E persona nan deteni ta:
- Un hende muher di inicial A.M.T.M. naci na Republica Dominicana
- Un hende homber di inicial D.J.L.K. naci na Aruba
- Di dos hende muher di inicial Z.A.R.A. naci na Venezuela y e di dos hende homber di inicial A.R.G. naci na Aruba.
E grupo aki supuestamente tabata acerca victimanan cu insinuacion nan di gusta hende pa despues pidi video of portret di parti intimo di e victimanan.
Unabes cu nan a graba e victimanan 'den accion', nan ta menasa e victima nan di publica e grabacion riba social media si nan no paga.
Un cantidad relativamente grandi di victima a wordo identifica y miles di florin a wordo paga pa evita cu video of potretnan bergonzoso wordo publica riba social media.
Durante e ultimo entrada hudicial e bin encontra tambe un cantidad basta grandi di placa na efectivo y akinan a detene un otro homber di inicialnan D.E.S.M. naci na Venezuela pa labamento di placa.
E investigacion ta continua y no por descarta cu mas detencion lo tuma lugar. KPA y OM ta pidi comunidad pa no cay den e weganan aki di tentacion cu por conduci na 'sexting', pasobra bo tambe por bira victima. Evita berguenza y perdida di placa y no cay den e trampanan aki.
