ORANJESTAD (AAN): Diabierna anochi laat, Centro di Alarma a core manda unidad di Bombero di Tanki Flip rumbo pa Paradera 31 como cu tin un vehiculo na candela den garashi di e cas.
Bomberonan y Polis a yega rapido na e cas aki poco pariba di rotonde, y a bin haya un SUV tipo Hyundai Tucson olor blanco na candela.
Mesora Bomberonan a drenta den accion, y a cuminsa combati e candela, cu ta bao di un garashi. Suerte ta cu prome cu esey, e candela no a plama bira grandi mesora.
E profesionalnan di Brandweer a haci nan esfuerzo door di actua rapidamente pa contene e candela cu tabata den un espacio chikito. Na final por a mira cu e hood di e Hyundai Tucson a wordo habri pa desconecta e bateria y esaki kizas ta un indicacion cu e candela a cuminsa den motor.
ABS-Module: Aña pasa na September 2023 caba DIARIO a publica cu Hyundai a haci un recall pa miyones di Hyundai Tucson di modelo 2010 te cu 2013, (incluyendo Hyundai Accent di 2012 te 2015) debi cu nan tin riesgo di pega candela. Hyundai a hasta pidi pa e doño di e vehiculonan aki por lo pronto staciona nan auto pafo y leu di cas of edificio, pues no para nan den garage pasobra inespera (hasta ora cu e auto ta switched off) e por cuminza kima.
E candela ta origina ora cu e module di e anti-lock brake system ta lek brake-fluid internamente, y esaki ta ocasiona un corto circuito electrico. Esaki ta ocasiona coriente demasiado halto den e ABS module, aumentando riesgo cu e ta cuminza kima, y plama e candela pa resto di motor.
