ORANJESTAD (AAN): Diadomingo despues cu solo a sali mainta, momento cu Park Rangernan di Parke Arikok a cuminsa labora,
y moviendo den area di Boca Keto na altura di e isla conoci como ‘Moro’, a bin topa un situacion inusual.
Polis a bisa cu tabata exactamente 7:45 am, cu Central di Polis a ricibi notificacion cu Rangernan a bin topa cu 2 boto na Boca Keto aki. Mesora a manda unidad di Polis di Santa Cruz rumbo pa e area aki.
Mesun momento a cuminza pone mas autoridad na altura. Polis a yega y descubri cu riba baranca tin un boto tipo yola cu un solo Yamaha Outboard Engine di 40HP, y e nomber riba e boto ta ‘Sorpresa’, y ta indica cu e ta di Las Piedras.
E otro boto cu ta un tiki speedboat, no tin nomber riba dje. Pero e tin si dos Outboard Engine di cual uno ta un Yamaha modelo Enduro. Paden a haya monton di jerrycan di plastico color preto. Riba beach a bin haya cantidad di cabuya, algun jerrycan mas, y algun jacket di salbabida. Tambe a mira rastro fresco di wiel di un vehiculo basta grandi 4x4 cu lo a yega hopi cerca.
Djis un tiki mas leu riba baranca, a bin haya un bari di plastico color blauw.
Bbanda di dje a haya 8 saco grandi color blanco di fertilizante di agricultura, di e marca ‘Nutrimon’. E saco ta indica cu nan por carga 50 kg. Den esakinan a bin haya droga aparentemente. Pues a lo menos tabata un “dropping” di droga, y kizas tambe arma y/of hende indocumenta.
Polisnan a cuminza check den e area y amplia nan zona di buskeda. A pone personal di Seccion di Crimen Organiza (UGC) di Cuerpo Policial na altura, y por a mira oficialnan ta haciendo buskeda den henter e area, incluyendo Shete.
Un biaha mas, pa con fastioso cu e por zona, ta asombroso cu no 1 pero 2 boto a drenta Aruba den oranan di marduga y move tur den Parke Arikok y ningun hende no a mira of tende nada. Raro cu e Marine-Radars rond di Aruba no a capta nan, of nan ta daña, of persona dilanti screen a pega soño marduga.
Algun rato despues, via di Centro MOC na Curaçao, a pidi Helicopter di Wardacosta di Caribe Hulandes, lanta vuelo di Hato na Curaçao, pa bin Aruba pa bula over di Parke y asina trata mira si tin hende scondi.
Locual a pasa aki ta sumamente peligroso, debi cu esnan cu a drenta tey rond awor aki y nos tur no sa ken nan ta, y sin papia mes di kico tur nan a trece.
Polis ta pidi cualkier persona cu a mira algo, pa yama Tip-Line di Polis na 111-41. Corda cu nan ta garantiza cu bo ta keda anonimo.
