ORANJESTAD (AAN): Tabata Diadomingo anochi trempan, banda di 6:45 pm cu varios persona a yama Polis,
pa bisa cu den cercania di Mooi Mooi Minimarket na Sero Blanco, nan ta mirando un homber pafo di e negoshi, y e persona aki ta masturbando den bista di tur hende.
Mesora un unidad di Polis di Santa Cruz a mobiliza pa e area pa purba di controla e acto inmoral aki cu ta socede riba caminda publico. Ora cu e unidad di Polis a yega na e Minimarket na Sero Blanco, a resulta cu e homber no tey mas eynan.
Pero Polis a haya un bon descripcion di e persona, y e detaye aki a wordo suministra na tur unidad riba caya.
Ni diescinco minuut despues, pa 7:00 pm, un informe nobo a drenta di algun persona para banda di Bon Dia Supermarket riba caminda grandi di Cumana, cu tin un homber eyfo para ta masturbando. Pues awor e persona a move 1.7 km mas pariba y haci mesun fechoria.
Pa casualidad net e momento ey, un Unidad di Polis cu cacho aden, esta un K-9 Unit tabata pasando den area, y mesora e agente policial a stop eynan. E agente policial a mira e homber cu ta cuadra cu e descripcion duna poco prome di Mooi Mooi Minimarket.
Polis a mira claramente cu e homber keto bay ta masturbando e momento ey.
E oficial a baha di su vehiculo y mesora a bay direccion di e homber pa asina e stop cu e acto inmoral aki. Ora cu e homber porfin su mente a bira un tiki claro y el a nota e homber yegando cerca, el a cuminza ta hisa su carson, y a cuminza trata cana bay cu rapidez.
Polis a papia duro y duna e homber ordo pa e stop, y pa e bira bek cara p’e. E homber a stop y bira bek, keto bay tratando di hisa carson.
E homber sospechoso di inicial E. a wordo wanta mesora, y a pone su mannan den boei. El a wordo aresta pasobra el a viola Articulo 2.193 di Codigo Penal di Aruba.
El a wordo hiba pa Warda di Polis, unda cu el a ser presenta dilanti Fiscal Auxiliar, kende mesora a duna ordo pa e keda encarcela pa interogacion, y pa papia cune pa haya sa kico ta e kick di haci e acto inmoral aki dilanti negoshinan di supermarket, y e peligro di wordo mira pa mucha.
Na final a informa Central di Polis di e exitoso detencion.
