Homber cu hopi golpi na cabes haya morto band’i caminda na Matividiri

Victima Sergio Maduro ta funcionario di C.E.A.

• A kere cu ta Hit & Run pero e ta parce di ta crimen
• Lo revisa Security Cameras di e barionan eybanda 

ORANJESTAD (AAN): Autoridadnan hudicial na Aruba a bin topa cu un caso misterioso pa investiga net riba Bispo di Pasco.  E prome parti di e investigacion tabata dirigi pa purba identifica un persona cu a ser haya morto, y despues a sigui cu e profundidad di e asunto, pa analisa y conclui si aki ta trata di un caso di accident di trafico, of ta trata aki di un crimen.

   Tur cos a cuminsa ora cu Diadomingo anochi pa mas o menos 7:00 pm, Central di Polis a dirigi unidad di patruya di Santa Cruz riba un caminda secundario den bario di Matividiri, cu ta keda net panort di Ayo den e zona pa bay sea Natural Bridge of Ostrich Farm.

   Esaki ta debi cu un ciudadano pasando eybanda a bin nota cu tin un persona benta abao, den e yerbanan banda di caminda di asfalt aki.

   Centro di Alarma a wordo avisa, y nan tambe a saca un unidad di Ambulans rumbo pa e lugar.  Ora cu e unidad di Polis a yega, nan a bin topa cu un homber abao cu multiple trauma y herida na su cabes.  Tabata comosifuera cu auto of otro vehiculo a dal e persona y bente eybao.  E prome observacion a wordo duna na Central, incluyendo e observacion cu e persona no ta duna señal di bida.

   Sin señal di bida: Ora cu Ambulans a yega, nan tambe a baha y Paramediconan a bay check e señal vital di e victima masculino aki, pero a nota cu e persona ta morto.  Mesora a pidi Centro di Alarma pa manda busca un Docter pa check e victima.  Polis a describi e victima como un homber di estatura no mucho halto, y su postura ta tiki delega.

   Central di Polis na su turno a pone demas oficialnan halto na altura di e caso aki, y a envolvi Recherche di Santa Cruz tambe.  A manda team forensico di BFTO tambe na e lugar aki na Matividiri, mientras cu Polis a cuminsa seya e lugar y no tabata permiti trafico pasa mas.

   Esaki ta debi cu ta bay start un investigacion pa determina kico por a pasa cu e persona cu a ser haya eynan sin bida. Pa 8:35 pm, Dr. Texier a constata morto di e homber Sergio R. Maduro di 44 aña naci na Aruba.

   Aunke autoridad na comienso a pensa cu lo por ta trata di un caso di Hit & Run, pero e hecho cu e persona aki no ta biba eybanda, pues e chens ta hopi abao cu e lo por ta un ‘peaton’ canando anochi ey Bispo di Pasco na Matividiri.

   Golpinan serio na cabes so: Fuera di esey, a bin haya indicacion cu e victima tabatin trauma y demas herida severo na su cabes so.  Pues tin nada di golpi na su pia, heup, ni tampoco barica y pechonan.  Pues aki ta cuminsa descarta e teoria di un accident di trafico.

   Informacion a drenta tambe cu e victima, ta un funcionario di Cuerpo Especial Arubano (CEA), y ta envolvi den e departamento cu ta encarga pa cuida diferente edificio d Gobierno.  Esaki ta habri caminda pa Recherche check cu e.o. su superiornan y tambe su coleganan, pa haya sa si acaso e victima Maduro aki lo tin problema na trabao, of den otro aspecto di su bida.

   Aki ta pensa cu kizas e victima Maduro a haya problema severo un caminda, y esaki a escala di tal forma cu el a haya golpi severo na su cabes cu consecuencia fatal.  E posibilidad ta cu nan a yega te eynan na Matividiri, y a djis sea habri porta of baki di pickup y bente na banda den yerba y lag’e atras net bao di un palo di luz.

   Autoridad hudicial ta check tambe e hipotesis cu aki por ta trata di un caso di tumamento di vengansa, y posibilidad ta existi cu e lo tin un debe habri cu un persona y di e forma aki ta bay den extremo pa “cobra e debe” bek.  Autoridad ta buscando e auto tambe di Maduro cu no por ser haya ainda.

   Recherche lo bay check tur e area aki di Matividiri y Ayo pa check si tin hendenan cu a mira movimento sospechoso riba Diadomingo merdia, atardi, y anochi trempan.  Tambe lo check si tin casnan cu Security Camera cu por a capta auto of vehiculonan moviendo.

   Pa e motibo aki tambe, Polis ta pidi cualkier persona cu por tin tip riba e asunto aki, y cu sa algo mas di Sergio R. Maduro, pa yama Tipline di Polis na 111-41 y corda cu bo por keda anonimo.  Nan investigacion ta sigui.

   Na famia di e fayecido, DIARIO como tambe Cuerpo Policial ta extende su mas profundo palabra di condolencia.