Bolita a kibra y ocasiona overdosis mortal
- Investigacion a cuminza y ya caba a detene dos hende
ORANJESTAD (AAN): Tur cos ta mustra cu un persona cu sea ta preparando pa sali di Aruba cu bolita den stoma, of el a caba di yega e isla aki, a topa cu e pesadiya di mas grandi! Esey ta ora cu diripiente bo ta bira hopi malo, y ta realiza cu un of mas bolita lo a kibra of explota den bo stoma of tripa.
Tabata Diahuebs dia 26 di December, atardi pa mas o menos 4:30’or cu Central di Polis a wordo notifica di un caso na unda un homber a bira hopi malo na un cas na Matadera.
Mesora a manda patruya di Polis di Noord na e adres, y tambe pidi Centro di Alarma pa manda Ambulance cu urgencia.
Na yega di Polis, y poco despues di Ambulance, e personalnan aki a topa cu un homber kende no tabatin señal vital mas. Toch Paramediconan a pone mashin pa check curazon, y busca un pulso, pero lamentablemente e homber a fayece, y nan a pidi pa Polis manda un Docter eynan.
Mirando cu e morto ta mustra misterioso, mesora Polisnan a seya e area rond di cas, y a pone demas oficialnan hudicial y autoridad competente na altura. Recherche di Noord a yega na e cas, y nan a cuminsa cu un investigacion riba e caso, y nan tambe a nota cu e situacion no tabata mustra natural. Asina rapidamente a cuminza sospecha cu e homber cu a muri ta un “mula di droga”, pues e tabatin bolita den su curpa. Esaki a kibra den stoma, y lo a ocasiona un overdosis mortal.
Docter Forensico di Polis, esta Dr. Voskuil a presenta y a constata morto di e homber T.A. D’Aguiar di 44 aña naci na Curaçao.
Team Forensico di BFTO, como tambe Unidad Narcotica a presenta pa asina haci nan investigacion. Riba ordo di Fiscal a laga tuma e curpa den beslag, pa practica autopsia.
Investigacion a escala: Mirando cu e caso aki ta bastante ‘cayente’ e momento ey, personal hudicial hunto cu Ministerio Publico a cuminza mobilisa mesora.
Enconexion cu e investigacion, ya caba riba Diabierna 27 di December den oranan di marduga, autoridadnan hudicial a detene 2 persona di interes. Ta trata di e homber J.M.Z. di 25 aña naci na Aruba.
Durante un razzia na un cas na Papilon, nan a sorprende y detene e homber G.ET. di 40 aña naci na Aruba.
Vocero Policial Liliana Rasmijn a confirma pa DIARIO, cu e caso ta pleno investigacion y no ta descarta cu lo tin mas detencion.
Cuerpo Policial ta haci un suplica na esnan cu a sa algo of a wak algo pa yama e Tipline di Polis cu ta 111-41. Corda cu nan ta garantiza cu bo ta keda anonimo.
