Accion na Matadera, Meiveld, y Driemasterstraat
ORANJESTAD (AAN): Tur cos a cuminza cu un investigacion serio relaciona cu posesion di arma, y envolvimento di e personanan den algun crimen fuerte.
A base di informacion compila, y cu luz berde duna door di Ministerio Publico, asina a prepara pa Diabierna mainta trempan na salida di solo, pa unidadnan di Polis di unidad Atraco Team (TBP), bao supervision di Ministerio Publico a acudi simultaneamente na 3 cas pa tene un razzia di sorpresa.
Razzia a ser teni na un cas na Matadera. Durante e entrada hudicial aki, oficialnan hudicial a topa y detene e homber J.R.M., di cual su edad no a wordo divulga.
Mesun momento na un cas na Meiveld tambe a tene razzia. Den e entrada hudicial eynan, a sorprende y detene e homber J.J.V.
Na un otro cas den Driemasterstraat, autoridadnan hudicial a topa y detene tanto e homber O.A.H., y tambe e homber R.J.H. Vocero di Polis a confirma cu tur cuatro persona deteni ta Arubiano.
Loke a ser haya: Durante e razzia, cu autorizacion di Ministerio Publico a rista extensivamente den tur skina. Esaki a pone cu autoridad a bin descubri un arma di candela, y tambe cantidad grandi di droga. Autoridad local sinembargo no a menciona cuanto e peso ta.
Hecho si cu durante e razzianan aki, ta diferente unidad di Cuerpo Policial a forma parti di e accion aki. Ta trata di Team di Aresto, Flex-Team , K-9 Unit, Recherche di Santa Cruz.
Vocero policial Liliana Rasmijn a confirma cu no ta descarta cu lo tin mas detencion.
Sigur un bon trabao di Atraco Team cu ta trahando incansablemente pa soluciona e casonan y como tambe kita arma di candela y droga for di caya.
Cuerpo Policial ta haci un suplica pa cualkier persona cu sa algo of a wak algo pa yama e Tipline di Polis na 111-41. Corda cu bo ta keda anonimo.
