ORANJESTAD (AAN): Un situacion di panico tabatin Diasabra merdia na un cas na Matadera, ora cu diripiente un homber a yega eynan ta puntrando pa cierto persona, y a mira claramente cu e tin un arma di candela den su poder.
Central di Polis a ricibi e informe aki Diasabra banda di 1:00 pm, y mesora patruya di Noord a ser manda pa e lugar. Otro unidad, e.o. di K-9 Unit tambe a mobilisa pa e adres.
Na yegada, manera ta den mayoria di e sorto di casonan aki, e persona a bay caba. Pero agentenan a papia cu varios testigo pa asina ricibi informacionnan adicional di e persona cu e arma, incluyendo su descripcion.
Autoridad a haya informacion cu e homber tin color di cuero blanco, y a specificamente yega y puntra pa cierto persona. A mira su arma di candela claramente.
E homber a bandona e lugar den un auto color blauw. Varios unidad den Noord mesora patruya nan a cuminsa tira bista pa un auto color blauw den e area debi cu no tin mucho informacion di esey. Algo notable ta cu daño a worde cometi tambe riba taira di e auto di e habitante na Matadera.
Polis ta investigando activamente in e caso serio aki di menaza bou investigacion, basa ariba declaracion di esnan cu a yama polis. Team forensico di BFTO tambe a acudi na Matadera pa haci investigacion.
