Hobennan mester a core pa scapa nan bida despues cu gang a core nan tras y menasa nan

Un di e hobennan a resulta seriamente herida

ORANJESTAD (AAN):  Diabierna anochi, pa medio di number 100, central di Polis a haya un melding pa un incidente cu a sosode cerca di Cheng Xing Supermarket na Paradera/Casibari.

             E informe ta indica cu dos mucha homber a bati alarma ya cu nan a wordo persigui pa tres homber. Despues di esaki, central a haya informacion cu e dos mucha hombernan pa nan seguridad a bay sconde na un cas den e becindario.

            Patruya a bay atende a caso pa asina busca e cas unda e dos hobennan tabata wardando pa wordo yuda. Ora cu e patruya a yega Paradera, e agentenan a topa cu e homber P. cu a declara cu tabata tin tres mucha homber den su patio.

1. a indica cu su cacho a cuminsa blaf y pesey el a bay wak kico tabata pasando pafo y el a wak tres mucha homber. Dos di nan bisti cu paña scur y otro na blanco.

            Ora cu e hobennan a percata di e presencia di e habitantenan, nan a spanta y a sali bay rapidamente. P. a bisa cu el a dicidi di bay tras di e hobennan cu su auto pa averigua pakico nan tabata haci den su propiedad.

            E patruya a bay haci un recorido den e area den direccion di Casibari y e patruya a wordo para pa dos hoben.

            E mucha hombernan a declara na Polis cu nan a wordo persigui pa tres homber cu cabey estilo rasta despues cu nan a sali di e supermercado. Nan a declara cu e hombernan  tabata papia na idioma spaño.

            Un di e mucha hombernan a declara cu nan a wordo persigui pa algun cacho y nan mester a core spanta.  Mientras cu e agentenan tabata papiando cu e hoben a nota cu e tabata tin un herida basta grandi na su pia (te na e weso) na su 'scheenbeen' links y tabata basha hopi sanger. Tambe e tabata tin un corta na su rudia banda drechi como tambe varios rasca na varios parti di su curpa.
            Polis a solicita un ambulance a traves di central. Ambulance a yega na e sitio pa asina duna tratamento medico na e hoben herida.

            Ambulance a traslada e hoben hospital pa e por a haya e tratamento medico debido. E agentenan a establece contacto telefonico cu e mayornan di e mucha homber. E mayornan a bay mesora Hospital pa asina reuni cu nan yiu. E agentenan a informa central di e sucedido.

             E mayornan a indica na e agente cu e hoben a bay un evento di scol na Casibari. Pa un rato, tres di nan a bay chines pa cumpra algun co'i bebe y ta na e momento ey cu tur cos a sosode.

            Mayornan a haci un denuncia na Polis pa menasa cu arma den direccion di e hobennan aki cu simplemente kier a huy di e cachonan y a bay topa cu un gang arma ya caba conoci den e area, cu e consecuencia cu e hobennan mester a core pa scapa nan bida y den e huymento, un di e hobennan, den tur scuridad, a trompica y cay riba un pida heki heridando su mes malamente.

            Riba potret por mira algun imagen di caso aki.