ORANJESTAD (AAN): Tabata Diaranzon marduga banda di 1:50 am, cu automobilistanan coriendo riba Watty Vos Boulevard a bin topa cu cantidad di obheto riba caminda, incluyendo un baranca gigantesco, y tambe tin mancha di azeta.
Un unidad di Polis di Playa a bay riba Watty Vos Boulevard, y net entre e Compleho di Casnan di Bushiri y e lugar di drecha tire, a bin topa cu obhetonan.
Muchanan baldadi cu tin nada di haci, lo a usa forza di musculo pa pusha algun baranca grandi for di e acera, y a logra te cu nan a lora esaki riba e caminda.
Esey ta nada! Nan lo a habri algun bleki of boter di azeta dushi bieu y plama esaki riba caminda.
Comosifuera poco, nan a dicidi na recoge cadushi tambe y a pone esaki na tur dos banda di e via di Watty Vos Boulevard.
Como cu tur e materialnan aki ta forma un peligro pa trafico, Polis a keda eynan cu nan luznan cendi pa adverti chauffeurnan. Asina a drenta den contacto cu e contratista di WVB Project, pa asina nan bin haci algo.
Nan a spierta un operator di e tractor chikito tipo Bobcat, cu a yega te eynan pa asina pusha y kita e barancanan for di caminda. Tambe a yuda recoge e cadushinan benta tur caminda.
Den pasado caba ora cu algun mucha malcria di Bushiri tabata tira piedra riba autonan riba Watty Vos Boulevard, a yega di sugeri pa instala algun Security Video Camera indestructible hopi halto na palonan di luz, pa asina por cuminza vigila e area y cuminza detene hobennan cu ta keda comete e actonan aki.
