ORANJESTAD (AAN): Tur cos ta mustra cu nan movimento riba lama a bay na un forma sospechoso!
Guardacosta di Caribe Hulandes, y awor tambe Cuerpo Policial ta vigilando Marine-Radar pa asina check si tin movimento sospechoso.
Hopi biaha sa detecta con botonan cu ta sali di Aruba, ta bay ‘topa’ otro boto cu ta mira ta bin for di zuid. E tipo di ‘rendezvous’ aki mayoria vez ta wordo asocia cu caso di contrabando, of traficacion di hende.
Diadomingo mainta, Guardacosta di Caribe Hulandes tabatin su speedboat tipo Metal Shark ta patruyando riba lama rond di Aruba, y a bay haci control riba un boto tipo peñero nabegando cu e nomber ‘Kayleen’, cu matricula A-2122.
Ora di yega cera, e funcionarionan a nota cu tin tres hende abordo y nan a bira hopi nervioso cu presencia di autoridad. Personal di Guardacosta a bay abordo, y a cuminza busca. Riba e boto a bin haya diferente paki cu ta mustra di ta contene hopi droga aden. Esaki tabata suficiente pa oficialnan detene tur tres persona.
A dicidi na trece e boto rumbo pa e Pier di Guardacosta na Savaneta, y aki a bay haci un control mas profundo. Den e pakinan enberdad tabatin cantidad di droga. Tambe a bin haya un arma di candela cu municion. Polis a ser informa, y tambe e Unidad di Crimen Organiza.
Fiscal Auxiliar a atende e tres detenido, y el a duna ordo pa nan wordo encarcela pa mas investigacion.
Guardacosta ta sigui vigila costa di Islanan ABC pa tur tipo di crimen, manera transporte di droga, di arma, y di hende.
