ORANJESTAD (AAN): Tabatin hopi dolor di cabez na e Casnan di Pueblo na Bushiri, conoci tambe como ‘Bushiri Complex’.
Diahuebs anochi banda di 10:45 pm, un unidad di Polis di Playa a ser manda na altura di Bushiri Complex como cu hobennan baldadi a cende un baki grandi di sushi meymey di caminda.
E tabata culminacion di loke a bin ta pasando di atardi pa anochi eynan na Bushiri. Y e habitantenan mes a cuminza fada di algun hoben malcria cu tabata comete esaki. Pesey mes e habitantenan a cuminza duna tip valioso na Polis di loke ta pasando.
Ora cu Polis tabata rumbo pa e candela, nan a haya extra tip di diferente habitante, kendenan a bisa claramente cu esnan cu a cuminza kima e baki di sushi, ta esnan cu tabata den un Hyundai blanco, y un Toyota shinishi staciona banda di otro, y staciona den parkinglot.
Polis a yega y berdad a mira e candela den baki di sushi. Tambe nan a bin topa cu e dos autonan staciona, pero no tabatin ningun hende den e auto e momento ey. Kizas nan a mira Polis, y a core bay sconde.
Ta trata aki di un Hyundai Eon color blanco, y banda di dje un Toyota Vitz color shinishi. Tur dos auto ta habri, y ambos tabatin yabi ainda colga na e ignition-switch.
Mirando e informe valioso cu e hendenan di e auto aki a causa molester, intrankilidad, y pega baki na candela, e Polisnan a dicidi na tuma accion. Nan a registra e number di e dos autonan aki, y despues a djis lock e dos autonan aki, y a kita ambos yabi.
Polisnan a bay bek cu e yabinan pa Warda di Polis, sperando cu e doñonan lo bay busca e yabi bek.
Polis ta gradici tur habitante cu a duna tipnan valioso, pasobra ta bisto cu nan a fada di wordo molestia pa algun grupo di hoben baldadi.
