Hoben venezolano di 19 aña tira mata dilanti American Bar

ORANJESTAD (AAN):  E horario di warda di Diaranson madruga a cuminza hopi trankil pa esnan trahando pa Polis y tambe na Servicio di Emergencia. 

Pero diripiente e anochi trankil a dal un buelta grandi, ora cu alarma a wordo bati di tiramento na San Nicolas.

   E informacion a cuminza circula, na momento cu algun hende a yega den auto dilanti Servicio di Emergencia na ImSan na San Nicolas.  Nan a trece un persona masculino cu tabata sangrando di heridanan di bala cu el a ricibi na su curpa.

   Mesora personal medico na ImSan a cuminza presta prome asistencia na e victima, pa purba stop e sangramento.  Tabata bisto cu e homber ta den shock y e curpa tabata cuminza perde e lucha pa keda bibo.

    Pa 3:55 am, esnan na ImSan a yama Central di Polis pa raporta loke a caba di socede.  Esey ta cu cu un hende homber a wordo tira dilanti American Bar den Caya Captain R. Rodger, antes conoci como Grensweg.

   Mesora Central di Polis a dirigi e patruya di San Nicolas pa bay check kico ta pasando na ImSan.  Tambe otro unidad a ser manda pa conserva e lugar dilanti American Bar.

   Ora cu polis a yega na ImSan, nan a  topa cu e testigonan cu ta esnan cu a trece e victima.  Polis mesora a tuma nan declaracion pa asina haya un bista di loke a socede.

   E testigonan a splica Polis, cu e victima tabata dilanti American Bar, cu e momento ey ya tabata cera basta rato caba prome.  E victima tabatin discusion cu otro hende na e lugar.

   Vocero di Polis, Lito Lacle, a djis bisa cu e testigonan diripiente a tende un tiro.  Nan a core bay yuda evictima, y a pone den auto y hibe na Centro Medico di ImSan cu ta apenas 1,5 kilometer mas leu, y entreg’e na personal di ImSan cu mesora a drenta cune pa yude.

   Sinembargo no por a haci nada, debi cu e tironan a afecta organonan importante di e victima.  Pa 4:25 am a nota cu e no tabatin signo vital mas, y e ora ey Docter a constata morto.

   Na prome instante, autoridadnan no tabata sa e nomber di e victima.  Pero a pone Recherche di San Nicolas, y tambe Slachtofferhulp na altura pa bin yuda.  Na e lugar di tiramento, funncionarionan hudicial forensico di BFTO tambe a presenta pa documenta e lugar di asesinato.

   Mas despues, autoridad a logra identifica e victima.  E ta Marc A. Mejias Flores di 19 aña di edad, naci na Venezuela.

   DIARIO ta corda lectornan, cu net ey dilanti mes tambe den Caya Captain R. Rodger, riba e madruga di Diadomingo 30 di Mei 2021, pues apenas 5 siman y mey pasa cu hendenan a pasa estilo drive-by shooting y a laga 4 hende herida.  Pero e biaha aki, Polis no a bisa prensa si acaso tabata un drive-by of ta algo otro.

   Polis ta pidi si cualkier persona mas por a mira loke a socede, pa yama e Tipline di Polis na 111-41 pa asina raporta e sucedido.

   DIARIO y Cuerpo Policial ta manda palabra di condolencia na e famia di e fayecido.