Hoben di 17 aña a fayece den accident violento cu motorcycle

El a bira di 11 morto den trafico

• Tristesa enorme pa cu fayecimento di Noah Hietbrink 

ORANJESTAD (AAN): Tabata Diadomingo marduga, ora cu mey anochi a caba di bati, cu habitantenan di casnan na Westpunt a tende un sonido di un motorcycle ta acercando for di zuid bayendo panort riba caminda di Noord bayendo Tierra del Sol, y diripiente esaki a comberti den boroto comosifuera algo fuerte a dal.

   Pa exactamente 12:02 am, cu e prome yamada a drenta na Central di Polis, pa raporta cu algo serio a socede cu un motorcycle.  Inmediatamente diferente unidad di Polis a mobilisa pa e sector aki, y Centro di Alarma na su turno a manda dos unidad di Ambulance.

   E prome unidad di Polis cu a yega a bin topa cu un situacion di horor.  Un motorcycle a wordo haya completamente destrui banda pabao di caminda net dilanti adres Westpunt 7.  Como 20 meter mas pazuid, banda di un trailer chikito pa benta sushi aden, pabao di varios baranca grandi dilanti cas Westpunt 5 a bin haya e motociclista benta abao, y no tabatin señal vital.

   Golpinan fuerte: Ora cu Ambulance a yega, mesora Paramediconan a baha check e motociclista abao dilanti Westpunt 5. tumando nota cu e tin basta golpi na curpa, pero no tin señal vital.  Mesora nan a notifica Polisnan cu tin di manda busca un Dokter, y tambe notifica autoridadnan concerni.  A pone paña blauw riba su curpa mientras tanto.

   E ora extra unidadnan di Polis a ser manda, y patruyanan a seya henter e pida caminda.  Prensa mes por a saca potret solamente for di un distancia.  Autoridad ta pensa cu e motorcycle bayendo panort, a keda hala banda robez di caminda, y a dal contra varios baranca cu tin banda pabao di caminda, esta dilanti cas Westpunt 5.  E motorcycle a kibra y bay finaliza como 20 meter mas panort dilanti cas Westpunt 7.

   E victima mes a bay cay como 3 meter pabao di e barancanan, cerca di e trailer.  Pues e victima a keda abao mey-mey di e barancanan y e cura di cas, manera e flecha ta indica riba e potret.

   Constata morto: Specialista di Trafico di Polis a yega, hunto cu Team Forensico di BFTO.  Poco despues, Dokter Forensico a constata morto di e hoben menor di edad, Noah Ian Hietbrink, naci dia 10 di November 2008 (edad: 17 aña) na Aruba.

   Personal di Bureau Slachtofferhulp tambe a yega eybao, debi cu famianan a cuminza presenta eynan.  A nota presencia di Alto Comisario Ramon Arnhem tambe, kende despues di a pone su mes na altura di e sucedido, a acerca e famia.  El a pidi e mama pa acompañ’e pa yega cerca pa check si e por identifica e victima.  Despues cu el a reconoce e victima abao como su yiu, Alto Comisario mes a acompaña e mama bek cerca su famia, ta dunando e palabranan di consuelo y forza y dunando sosten humano na e famia.  Tabata reina un tristeza enorme eybao e momento aki.

   Hoben tabatin cabey largo antes: Noah Hietbrink kizas riba e potret aki no ta wordo reconoci pa su amigonan, como cu te cu alrededor di 3 aña pasa, semper e tabatin cabey largo.  Pero awendia e ta cu cabey cortico.

   Vocero Liliana Rasmijn di Polis, a confirma cu Noah Hietbrink a bira e di 11 morto di trafico pa 2026.  El a splica cu e rapport final lo wordo traha door di Polis di Trafico, cu ta bay haci tur analisis, incluyendo revision di posibel security video cu por tin den e area.

   Noah a bay laga su mama y tata, y tambe un ruman chikito atras.  E investigacion a sigui te den oranan di marduga.

   DIARIO y tambe Cuerpo Policial ta extende palabranan di profundo condolencia na famia di e hoben.  Polis ta haci suplica na comunidad, pa den ultimo lunanan di aña, pa ban trankilo den trafico.

   Recien DIARIO a publica cu awor na Aruba ya tin casi 101.000 auto y vehiculo coriendo cu nummerplaat.  Pues trafico ta bira hopi congestiona, y si bo tin di yega na tempo na scol, trabao, of na reunion, percura pa bo sali mas trempan pa bo yega na ora.