Caso tragico Hogamento na beach
ORANJESTAD (AAN): Diadomingo atardi banda di 3:40 pm, un unidad di Polis di San Nicolas a ser manda na Big Mama Grill pariba di Baby Beach, como cu hendenan a haya un smartphone laga atras, y cu esaki posiblemente ta pertenece na un turista.
Ora cu Polis a yega na e negoshi, nan a papia cu un empleado di Big Mama Grill. El a declara cu recien un ciudadano di inicial S. a trece un Samsung smartphone color preto. E ciudadano S. a bise cu e smartphone ey el a haye na fondo di lama. El a bisa cu e mesun smartphone ey el a mira algun minuut prome den man di un turista kende tabata snorkel hopi cerca di nan area.
Na momento cu e ciudadano S. a saca e smartphone for di fondo, el a trata di localiza e turista, pero e no por a mire mas.
Polis a cuminza controla rond di Baby Beach. Durante e control, e agentenan a wordo acerca door di un personal di De Palm Tours. El a bisa cu e ta sinti falta di un turista cu ta den su Tour Group.
El a bisa Polis cu e esposa di e turista perdi ta sinta riba santo blanco di Baby Beach. Polis a bay cerca e señora di inicial S. El a declara cu e ta wardando pa su casa T.S. sali for di lama. E unidad di Polis a lage mira e Samsung smartphone color preto, y el a confirma cu esey ta di su casa.
Relaciona cu esaki, agentenan a pone Central di Polis na altura di e desaroyo nobo aki na Baby Beach. E unidad di Polis a bay controla patras di JADS. Algun minuut despues, e unidad di Polis a wordo aceca pa un grupo di hende cu tabata banda di Rodgers Beach.
Nan a declara cu tin un curpa sin bida na costa. Mesora Polis a core bay check e curpa, y a constata cu ta trata aki di e turista T.S.
Mesora a pone Central di Polis y a notifica demas autoridad. Tambe a pidi presencia di Bureau Slachtofferhulp pa bin eynan.
E momento aki tabata hopi duro pa e señora cu a bin haya su casa eybao sin ta duna señal di bida. Mientras tanto a manda busca un Docter pa bin na e lugar.
Pa 6:00 pm, Dr. Texier a constata morto di e turista.
Na famia di e fayecido, DIARIO y Cuerpo Policial ta manda palabranan di condolencia.
