Halloween anochi riba caya a bay basta trankil

Presencia policial tur caminda

• Polis a controla total di 245 auto 

ORANJESTAD (AAN): Diasabra anochi, cu a observa Halloween den varios area di e isla, e unidadnan di Polis di Noord hunto cu Unidadnan Motoriza tabatin un presencia masivo, specialmente den areanan unda a organiza fiestanan di disfraz.

   Polisnan di Noord a combina esaki cu un Control di Trafico, y a staciona nan mes na lugarnan strategico pa haci esey den henter e distrito, incluyendo Palm Beach.

   Pues mientras cu tabatin hende disfraza ta canando banda di caminda, Polisnan tabata para autonan pa haci control.  Vocero Liliana Rasmijn di Cuerpo Policial Aruba, a splica cu riba Diasabra anochi nan a controla mas di 245 auto.  Di tur e controlnan aki, na final 95 automobilista a ricibi un boet.

   E boetnan tabata pa rijbewijs, keuringskaart, seguro di auto, celular, impuesto di plach’i number, etc.

   Durante control a haci dos detencion. Esaki tabata pa posecion di droga (marihuana). Tambe a confisca un brommer pa motibo cu e manehador no tabata tin su documentonan na ordo. 

   A compronde cu e anochi di Halloween a bay basta trankil, y no tabatin ningun disputa, ningun friccion, nada di evento di lamenta.  Tur hende a comporta bunita, y e hecho cu Polis tabata masivamente presente den e areanan aki, a contribui cu tur cos a keda rustig.

   No ta djis Polis di Noord so a keda vigilante, pasobra diferente departamento policial a forma parti pa e control den trafico como tambe area hotelero di Hot Zone. Ta trata di polis uniforma, unidad Motorisa, K-9 Unit, Flex-team. Tambe departamento di CEA, KMAR y DTP.

   Segun Polis, e control den trafico lo sigui y KPA ta keda cordabo pa percura bo tin bo documentonan na ordo y rijbewijs valido y cu bo.

  Sigui reglanan di trafico y corda cu bo comportacion den trafico ta bo responsabilidad.