Guardacosta controlando botonan na Curacao a bin descubri droga

ORANJESTAD (AAN): Diadomingo e unidadnan di Guardacosta di Caribe Hulandes hunto cu algun departamento mas, a bay haci control riba lama rond di e islanan di Caribe.

   Na Curacao, durante e control e boto di Guardacosta di Caribe Hulandes tabatin e team multidisciplinario abordo.  Y ora di pasa cerca di Santa Barbara Baai y tambe Fuik Baai, nan a bin topa dos boto sospchoso.

   Guardacosta a dicidi na haci un control riba e botonan aki, y aki ta unda cu a bin topa cu droga tambe.

   Nan a confisca e droga, y en total 6 procesverbaal a wordo traha pa cu e hendenan riba e botonan aki.  Na final, un persona a ser deteni.

   E patruyahe di Diadomingo tabata un cooperacion entre Guardacosta di Caribe Hulandes, Inspeccion di Seguridad di Waf, Cuerpo Policial di Curacao, Douane, Marechaussee, y Maritime Authority Curacao.  Nan lo sigui eherce e tipo di control aki den temponan venidero.