ORANJESTAD (AAN): No ta conoci kico a ‘trigger’ e controlnan aki, posiblemente lo a haya tip of indicacion di inteligencia, cu tin hopi pasahero ta bula entre Aruba y Republica Dominicana cu sumanan grandi di placa den nan maleta.
Pesey mes, riba Diaranson, e asina yama ‘Afpakteam’ a tene un control integral riba diferente vuelo cu ta sali di Aruba pa Republica Dominicana.
Ministerio Publico a confirma esaki, y a splica cu e control tabata dirigi riba violacion di e meldplicht di cantidadnan di placa cash. Esey nifica cu na Arua, tur pasahero ta obliga pa meld di antemano na Aduana si nan ta viahando cu mas di 11.000 Dollar (igual cu 20.000 Florin) den nan poder.
Afpakteam ta un alianza di Ministerio Publico, Polis, Aduana, FIU (Financial Intelligence Unit), Marechaussee, Wardacosta di Caribe Hulandes, y RST y ta traha riba combati criminalidad financiero-economico. Cu tips y señalnan di labamento di placa bo persona por acerca Afpakteam via tipline 111-41. Corda cu bo por keda anonimo.
Riba Diaranson, a haci e control riba pasaheronan y na final ningun pasahero a keda deteni. Pero Ministerio Publico a adverti cu den futuro, Afpakteam lo tene e tipo di controlnan aki mas biaha na Aeropuerto di Aruba. Pues si bo ta viahando cu hopi placa cash, mihor bo meld esaki.
