ORANJESTAD (AAN): Atracadornan no ta djis hit negoshi of companianan grandi mas!
Awor ta mik riba cas di famia tambe, y Diahuebs atardi esaki a trece panico pa un famia cu ta biba na Tanki Leendert, cerca di e caminda principal di Kibaima pa Pos Abao.
Pa exactamente 4:03 pm, cu alarma a wordo bati na Polis, pa mustra cu na un cas na Tanki Flip un atraco a caba di socede.
Mesora diferente unidad di Polis a mobilisa rumbo pa e cas aki cu ta keda pazuid di caminda. Na yegada di patruya di Polis, nan a bin topa cu hendenan herida na e cas. Nan a bin compronde di un di e victimanan cu un rato prome un hende homber di habla hispano, bisti full na preto, pero cu color di cuero bruin, y cara tapa a trata na atraca nan.
E victima a splica polis cu e sospechoso tabata tin un arma di candela. E momento ey tabatin dos hende na cas, y nan dos a haya balentia y a dicidi na bringa cu e sospechoso, y na un momento un tiro a los. E sospechoso a bandona e lugar na pia.
Mesora a notifica demas unidadnan riba caya, pa check e persona cu lo por ta canando na pia den Tanki Flip rumbo pa sea Ponton of pa Shaba.
Ambulance a yega na e lugar pa asina brinda asistencia medico na e dos victima cu tabata tin sla na curpa. Atraco Team y Team Forensico di BFTO y Bureau Slachtofferhulp tambe a presenta na e lugar pa haci nan investigacion como brinda sosten na e victimanan.
E sospechoso te cu ultimo informacion no a logra bay cu nada. Un rato despues patruya cu tabata buscando den e area, a bin topa cu e muts cu el a tapa su cara cune poco pariba di e cas. Lo bay haci analisis forensico di e muts aki.
Vocero Policial Liliana Rasmijn a indica cu e caso aki ta den pleno investigacion, pero ta pidi tur hende cu por a mira algo, sea den e area unda antes tabata Tao Bao na Tanki Flip, of esnan cu ta biba riba e caminda pabao di Arucamba Snacktruck (ex-Seguros Aponte), y cu a mira algo e atardi ey, pa yama y duna informacion na Tipline di Polis na 111-41. Corda cu nan ta garantiza cu bo ta keda anonimo.
