Gio Heronimo riba motorcycle a perde su bida na Calabas

Investigacion pa determina causa exacto

• Kizas el a bira malo prome cu el a cay di motorcycle           

ORANJESTAD (AAN): Habitantenan na e birada di Calbas pa bay Kudawecha a tende sonido fuerte Diadomingo marduga, y mesora a core yama Polis.

   Pa exactamente 3:30 am, Central di Polis a cuminza ricibi notificacion, cu un motorcycle a accidenta na e birada aki, y nan ta mira cu e motociclista no ta reaccionando.

   Inmediatamente a cuminza manda patruya di Polis di Noord, y a notifica Centro di Alarma pa nan cuminza manda Ambulance pa eynan.

   E prome unidad di Polis cu a yega, a bin topa net pabao di e cas Calbas 9-A cu un motorcycle benta abao banda panort di e birada, y e manehador un tiki banda di dje.  Polis a core bay check, y a nota cu e persona masculino ta den situacion grave.  Nan a core pidi pa Ambulance yega aun cu maximo urgencia.

   Otro unidadnan di Polis cu a yega, a cuminza yuda pa desvia trafico pa asina no contamina ningun rastro y demas indicadornan cu por yuda soluciona e causa di accident.

   Ora cu Ambulance a yega, mesora Paramediconan a baha pa check e victima, pero inmediatamente nan a nota cu e no tin ningun señal vital.  Esey ta loke nan a notifica Polis mesora di dje, esta cu nan tin di manda un Docter pa bin eybao.

   Polis e ora a core pone autoridadnan concerni na altura, y a pidi pa manda Specialista di Trafico, y tambe e team forensico di BFTO.

   Algun rato despues, e medico forensico di BFTO a yega, esta Dr. Voskuil, kende a constata morto di e motociclista Giomar Adriano Heronimo, naci na Aruba dia 14 di Juni 1975, pues tin 50 aña di edad.

   Fiscal a duna ordo pa confisca e curpa pa mas investigacion.  Pues te ainda no por bisa si el a muri door di e accident, of e caida, of si ta malo el a bira prome cu el a cay cu e motorcycle.  Ta pesey a confisca e curpa, pa practica autopsia y haya sa e causa exacto.

   Polis a pidi presencia tambe di e profesionalnan di Bureau Slachtofferhulp cu a bin duna guia na e famia na e momentonan ey.

   E victima “Gio” ta un persona kende tabata semper hopi envolvi den deporte di Motorsports, y a yuda hopi den participacion den caredanan di Go-Kart.  Lo wordo recorda pa hopi amigonan como un persona cu habilidad experto pa haci tune-up di motor, reparacion, y sa di diagnostica tur problema cu cualkier cos cu ta traha cu motor.

   Na famianan di e fayecido, DIARIO y Cuerpo Policial ta manda palabranan di condolencia.