‘Vacuum-Truck’ a explota
ORANJESTAD (AAN): Diaranson mainta un situacion di emergencia a presenta su mes riba tereno di RdA na San Nicolas, ora cu inespera un Truck cu tin un tanki grandi riba dje, conoci como ‘Vacuum Truck’ cu ta pertenece na un contratista, a explota. E contratista ta haciendo trabao di mantenimento riba e tereno aki.
E sonido fuerte aki a spanta pueblo di San Nicolas inmensamente, y e explosion a wordo sinti fuerte na Savaneta, y te hasta na Macuarima tin hende cu a sinti esaki.
Ora di e explosion, un huma blanco diki por a wordo mira ta bay halto for di riba e tereno di e refineria, aunke no a mira nada di vlam geel cu ta mustra di ta candela.
E tanki y tambe e Truck a keda basta destrui door di e explosion, pues total-loss y nada ta sirbi mas.
Yamadanan a cuminsa drenta na Polis, y mesora a dirigi unidadnan rumbo pa Refineria.
Pero tabata Centro di Alarma 911 cu a ricibi e prome informacion di e explosion riba tereno di FMSA na San Nicolas, y mesora Ambulance tambe a bay como cu a drenta informacion cu tin dos hende herida. Despues na final a conclui cu ta tres persona a keda herida.
Mientras tanto unidadnan di Bombero a mobilisa pa asina sigura cu tur peligro a pasa, y revisa e area unda esaki a socede. E presion di e explosion a pusha varios bari tur rond di e area. E barinan aki tin como 10 aña riba tereno.
Un ehecutivo di FMSA a indica cu e explosion a destrui e Truck so, y no a causa ningun daño na instalacionnan di e Refineria. Profesionalnan tecnico di Departamento di DTI tambe a wordo manda eynan pa haci un investigacion riba loke a socede.
E heridonan a ricibi algun trauma basta severo, y Polis e ora a dicidi na escolta e unidadnan di Ambulans for di San Nicolas te na Playa pa yega Hospital, aunke a nota cu e Ambulancenan no tabata core cu velocidad halto.
