ORANJESTAD (AAN): Solo apenas a sali, y un unidad di oficialnan di Jeugd- en Zeden Politie hunto cu mas refuerzo a yega na un cas na Tanki Leendert.
Esey ta debi cu nan a yega cu orden di aresto contra e conocido ex-locutor y presentador di programa na radio, esta Elvis Weert Sr.
Nan a drenta e cas, pone man riba Weert y a lese su derechonan, indicando cu e ta wordo deteni pa e.o. abuso sexual di menor di edad.
Vocero policial Lito Lacle a confirma esaki na prensa, indicando cu a detene e homber aki naci na Aruba y cu tin 60 aña di edad.
El a splica cu esaki ta pa “abuso sexual di menor (Articulo 2.197, tambe Articulo 2:200 jo. Articulo 2:210, tambe Articulo 2:201 jo. Articulo 2:210 y, y tambe Art. 2:208 di Codigo Penal).
Polis a bisa cu na e cas a confisca entre otro computer, laptop computer, smartphones, y tambe por a mira cu a bay cu varios harddrive di e cas.
Na Aruba, esaki ta e di tercer biaha cu Elvis Weert Sr. ta wordo deteni pa asina wordo interoga relaciona cu e acusacionnan cu tin contra dje. Mirando cu e biaha aki e acusacionnan ta cubri varios articulo di codigo civil, lo por tin indicacion cu e situacion ta serio.
Manera ta conoci, no ta na Aruba so e persona aki a yega di haye envolvi cu autoridad. Durante temporada di Augustus 2000, Elvis Weert a haye den problema na Curacao, unda el a hinca su ex-muher y despues a herida su mes, y e tempo ey Voogdijraad na e isla a traha un dossier amplio di loke a pasa cu e dama y e dos yiunan. Pero e caso no a sigui debi cu Weert a suplike pa retira e denuncia.
Despues di esey el a bin Aruba y a haya trabao como locutor di noticia na radio y tambe cu ta atende yamada di publico. Na un ocasion den oranan di anochi, el a keda deteni despues di tabatin un discusion cu a sali for di man pafo di un Casino local, y e biaha aki contra su pareha di e tempo ey.
Na luna di Januari 2019 tambe a detene Elvis Weert relaciona cu posibilidad di a actonan inmoral cu menornan di edad, cu pa colmo ta yiunan di su pareha e tempo ey. Autoridadnan a haya nan ta investigando e caso ey cu tabata un acusacion di maltrato contra e yiunan, tambe di abuso, y esey a inclui abuso sexual di un persona di edad hoben.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey ta pidi si bo tin cualkier informacion yama tipline di Polis na 111-41. Autoridad ta garantisa cu bo ta keda anonimo.
