ORANJESTAD (AAN): Tabata Diasabra anochi pa 9:40 pm, cu un unidad di Polis di San Nicolas a wordo manda na un area den Nijhoffstraat pa check un caso di atraco.
Ora cu Polis a yega, nan a papia cu e victima di inicial R. El a bisa Polis cu algun instante prome el a wordo atraca door di tres homber desconoci.
Tur cos a cuminza ora el a duna un amigo lift pa hibe su cas. Ora cu el a sigui core riba e caminda di St. Antoniebergweg, diripiente dos homber desconoci a core sali for di un cura di cas. E chauffeur R. a core rapidamente bay y a regresa cas di su amigo pa pidi yudanza. Ora cu el a yega na cas di su amigo, el a nota cu e hombernan desconoci a bin su tras den un auto.
Dos di e hombernan desconoci a habri su porta di auto, y a rek y saca e homber R. for di su auto, y a cuminza dal e y yen’e cu scop.
Un di tercer homber a cuminza listra den su auto Toyota.
Mientras tanto, e hombernan a rek y kita tres cadena di oro cu e tin rond di su garganta, esta dos di oro 14k, y tambe uno di 22k. Tambe a bay cu 4 armband di oro, di cual dos ta di oro 14k, y dos di 22k, y tambe 3 renchi di oro di oro nan a kita di su dedenan. Na un di e cadenanan tabatin un renchi di casamento.
E victima R. a bisa cu e no por a bira e auto di e sospechosonan. El a bisa cu e sospechosonan tur ta bisti na preto y nan tabatin nan cara tapa.
Asina a pone tanto oficialnan hudicial forensico di BFTO, tambe Recherche di San Nicolas, y tambe funcionario di Slachtofferhulp y takelwagen pa transporta e vehiculo aki.
Ambulans tambe a yega na e lugar, y a transporta e victima pa Hospital como cu el a keda hopi maltrata mes den e atraco.
E auto di e victima a wordo poni na Warda di Polis pa mas investigacion door di BFTO.
