ORANJESTAD (AAN): Tabata Dialuna anochi banda di 8:45 pm, net ora cu un unidad di Polis di Noord ta coriendo den area di Noord y Palm Beach, algo a hala nan atencion.
E unidad ta coriendo cu bentana baha, y diripiente na altura di e cruzada di Noord cu ta bay pa Palm Beach, Washington, y Monserat, un holor fuerte di marihuana huma a dal nan.
Polisnan a hisa cara y a mira un Delivery Van di marca Hyundai H-1 cu un persona aden. Polisnan a bay para cerca e homber aki y a papia cune. E homber a bisa cu e no sa di nada. Toch Polis a listre na su curpa, y haya nada. Despues e mes a duna Polis permiso pa controla su Delivery Van. Agentenan a check tur caminda pero haya nada den e Delivery Van.
Pero net e momento ey, e agentenan a mira un persona ta saliendo for di e banda pariba di un Restaurant Asiatico cu tin na e cruzada ey. Y e persona ta cana bin nan direccion.
Sinembargo ora e homber aki a mira cu tin Polis, el a stop y bira mesora 180 grado y a cuminza bay bek den direccion contrario alehando di nan. Polis a haya esaki hopi notable, y agentenan a bay su tras tambe. Ora di yega cerca, Polis a bin nota cu ta trata aki di dos homber cu ta canando hunto.
Polis a bolbe cuminza haya holor fuerte di marihuana, cu ta bin for di e dos hombernan aki. Polis a duna nan ordo pa stop di cana, y aasina a bay atende nan.
Polis a listra e paña di e hendenan aki. Nan a wordo poni na altura di e motibo pakico nan ta listrando nan, y tambe pakico a stop nan. No a haya nada den nan poder.
E dos hombernan aki a bisa cu nan ta turista, y cu enberdad nan a caba di huma un cabito di marihuana, Tambe nan a bisa cu nan ta hospedando na un hotel den cercania, pues nan no tin auto y cu nan a cana bin e Restaurant aki na Palm Beach pa cumpra cuminda.
Despues e hombernan a cana direccion di e entrada di restaurant.
Pero Polisnan a keda haya holor di marihuana cu ta parce ta bin for di banda pariba di e restaurant. A bay check mas cerca y a topa cu un V-auto color blanco Hyundai Accent. Mirando e hecho cu Polisnan no sa di unda exacto e holor ta bin, e agentenan a dicidi pa djis sigui cu nan patruyahe.
Pero Polis a keda den vecindario ta vigila. Algun rato despues e patruya a bolbe pasa den vecindario di e Restaurant Asiatico y a mira cu tin dos hende sinta den e V-auto Hyundai Accent color blanco.
Polis a yega y staciona nan patruya net patras di e Hyundai Accent aki. Agentenan a baha y bay atende esnan den e auto. Pa nan sorpresa, ta trata di e mesun dos ‘turista’ cu un rato prome nan a atende, y cu a bisa cu nan no tin auto.
Agentenan mesora a puntra nan kico na nta haciendo. For di su mesun iniciativa sin cu el a bisa algo, e chauffeur a gara un heuptas color blauw di e auto, a saca un sakito di plastico conteniendo yerba parecido na marihuana, y a pone esaki riba e baul.
E pasahero a bisa mesora cu el a haya e sakito cu contenido riba beach.
Relaciona cu esakinan, Polis a mustra nan cu nan a viola Articulo 3 y 4 di Ley di Droga, y mesora nan a keda deteni. Nan a lesa tur nan derecho ora di aresta nan, y a mustra nan derechonan segun Capitulo 1 articulo 1.5 sub 3 bao ‘b’ di Constitucion di Aruba.
Polis a bay controla check kico mas tin den e heuptas, y a bin haya varios sakito di plastico cu ta contene marihuana. Tambe a haya sakito di plastico conteniendo varios pildora blanco, y tambe diferente pildora oranje, monton di Florin Arubiano, Dollars Mericano di diferente papel, y tambe un Vape-Pen.
Polis a habri e baul y a bin haya un rugtas blauw. Agentenan a habri e tas aki y a bin haya varios material, manera bakinan di plastico transparente conteniendo yerba berde parecido na marihuana. Tambe a haya un baki blanco yena cu pildora oranje, mas Vape Pen, diferente placa di papel Arubiano.
E sospechosonan a wordo transporta pa Warda di Polis na Shaba, unda nan a ser presenta dilanti un Fiscal Auxiliar. El a tuma nota di tur e mercancia ilegal cu a wordo haya den nan poder, y el a dicidi pa laga e hombernan aki keda deteni na Warda di Polis na Shaba.
Polis a confisca e Hyundai Accent di huur tambe, y lo sigui haci investigacion riba dje.
E unidad di Crimen Organiza (UGC) a wordo notifica pa sigui cu e investigacion.
E dos personanan aki lo por ta dos heavy-boys cu lo ta deal cu droga, incluyendo pildora cu kizas por ta Ecstasy, of Amphetamine, como tambe Molly.
