Alto Comisario Tjon-Kock: - ORANJESTAD (AAN): Cuerpo di Polis ta confrontando un ola di violencia den e ultimo simannan. Diferente suceso a tuma lugar recientemente unda arma di candela ta envolvi.
Alto Comisario Vanessa Tjon-Kock a duna di conoce den conferencia di prensa dialuna mainta cu e mes mester a responsabilisa su mes den Parlamento relaciona cu loke ta pasando cu e tiramentonan na Aruba.
Tur loke ta trata delitonan di violencia caminda cu tin posesion di arma ta un prioridad den Cuerpo Policial. Atraco ta un tipo di violencia asina, a agrega.
Den e ultimo temponan KPA ta wordo confronta cu hopi tiramento. Riba caya of cu a costa bida di varios hoben, a splica.
Pa loke ta trata investigacion, tur e casonan aki ta wordo resolvi, pero esaki no ta significa cu no tin un problema, a Tjon-Kock a remarca.
E ora ta ripara cu e strategia cu Cuerpo Policial ta bezig aworaki cu ne ta identifica no solamente e problema cu tin den e hobennan cu ta causando e tipo di delitonan aki of cu ta bira e victima. Pero tambe pa wak nan trayectoria, unda hopi biaha ta wak e componente social
Di otro banda tin e controlnan cu KPA ta haci den weekend caminda cu ta pone practicamente tur unidad di polis riba caya. No ta bay solamente pa e cantidad di polis cu ta pone riba caya. Mester por ekipa nan tambe cu e materialnan cu mester tin na e momento ey manera 'bulletproof vest', pero asina por keda nombra otro tipo di material, Vanessa Tjon-Kock a enfatisa.
KPA ta enfatisando riba e lugarnan caminda cu nan ta haya informacion cu ta hayando cu e tipo di casonan aki. Ta identifica e gruponan di hobennan aki cu diferente biaha ta involucra den e casonan aki y asina ta ataca e problema, a bisa.
Esey ta los di e parti di costa pasobra no mester lubida riba e parti con e armanan ta drenta Aruba.
Tur esaki ta wordo poni hunto den e proceso y strategia di Cuerpo Policial, pero aworaki ta focus hopi riba e tipo di personanan cu ta cometiendo e delitonan, e lugarnan, e modus operandi, pero tambe ta wak con pa evita esaki, Alto Comisario a indica.
El a agrega e parti di prevencion poniendo bastante enfasis riba dje manera cu e hacie den e weekend cu a pasa haciendo hopi mas control riba por ehempel e vehiculonan cu e personanan aki ta uza, e lugarnan cu nan ta frecuenta. A base di esey ta hacie na e parti preventivo.
Den e parti represivo den diferente ocasion no ta wak esey facil te ora cu tin un investigacion, e representante di Cuerpo Policial a declara.
