Durante Parada di Flambeu a Polis haci  8 detencion

E aña aki cantidad di detencion a baha

ORANJESTAD (AAN): Diasabra anochi, pa exactamente 8'or di anochi, a duna inicio na e Parada di Flambeu, cu a sali for di dilanti 520 Home Sweet Home na Avenida Milio Croes. E momento di cende e flambeu pa duna comienzo na e parada a wordo atendi conhuntamente pa Cuerpo Policial, SMAC, y Minister President Sra. Evelyn Wever-Croes.

            Durante e parada, Cuerpo Policial a conduci un control riba e vehiculonan cu a forma parti di e parada. Den e inspeccion a resulta cu tin vehiculonan sin nan documentonan necesario y a detecta tambe un UTV cu no tabata tin su documento na ordo. E parada a wordo para temporalmente te ora cu nan por a soluciona e situacion.

            Despues di e breve interupcion, e parada a sigui su curso y pa 12:43 am, e cabes di e parada a yega na e punto final, cu ta ex-DOW, pa finalmente termina completamente pa 2:58 am di marduga.

            Den e transcurso di e parada, Cuerpo Policial a logra haci 8 detencion pa varios motibo, incluyendo buracheria, bringamento, posesion di droga, posesion di arma blanco, y insulto na un miembro di polis.

            Un total di 2 detencion ta relaciona cu situacionnan di maltrato, cu a ser referi na e departamento di recherche pa investigacion adicional.

            Ta importante menciona cu, en comparacion cu e aña anterior 2023, unda a registra 19 detencion durante e Parada di Flambeu, e cifra di detencion a disminui e aña aki.

            Cuerpo Policial ta sigui trahando pa mantene e orden y sigura un ambiente safe durante e celebracionnan di carnaval.