Dos hoben cu a tira Suyari mata ta meti tambe den tiramento drive-by dilanti American Bar

Ambos tin 17 aña di edad - ORANJESTAD (AAN): E caso cu a keda registra siman pasa Diadomingo madruga den Caya Captain Rodger na San Nicolas, tabata uno cu realmente a trece panico. 

Un Nissan March a pasa poco-poco na altura di American Bar, y esnan den e auto a los tiro riba un grupo di persona, lagando 4 hende herida, di cual 2 tabata serio.

    Despues di esey e chauffeur di e Nissan March a primi trot y a desaparece di e lugar.  Comosifuera loke nan a caba di haci ta un video game, pensando cu ta djis primi boton di ‘reset’ y tur hende ta lanta bek di eybao.

   E ta mustra tambe alavez, cu tin algun hende den comunidad cu tin ningun nocion ni comprondemento riba e importancia di e bida di un ser humano.  Nan mes kier huzgabo y condenabo mesora door di tira riba bo.

   Awor a sali na cla, cu e personanan den e Nissan March aki cu dia 30 di Mei 2021 a los tiro na cantidad dilanti American Bar, ta esnan envolvi tambe den e asesinato estilo “execution” na un cas den Flamboyanstraat na San Nicolas riba Diabierna 4 di Juni 2021.

   Pues ni 5 dia despues, e mesun personanan aki a demostra ta con ‘trigger happy’ nan ta, y ta tira un dama inocente di apenas 20 aña di edad.

   Esey ta loke vocero policial Lito Lacle a confirma na prensa.

   E bon noticia ta cu Diabierna ey mes, un di e hobennan di inicial P. di 17 aña a bay entrega su mes na Warda di Polis.  Mas laat durante un razzia na Yara, a detene un otro hoben di inicial Z.A.C. di 17 aña.

   Vocero Policial a indica cu e duo deteni aki, ta sospecha di ta esnan cu a basha bala den e drive-by den Caya Captain Rodger.

   “E dos hende hombernan aki di apenas 17 aña di edad ta worde sospecha tambe di tin di haber cu e caso cu un auto a los tiro riba diferente persona, di cual 4 persona a resulta herida,” vocero Lacle a bisa.

   El a agrega cu no ta descarta cu nan ta envolvi den mas caso recien di tiramento na Aruba.  Pesey awor Recherche di San Nicolas ta hayando input di demas departamentonan pa asina mira ki coincidencia tin.

    E caso di drive-by dilanti American Bar, a causa cu dos persona a keda interna na Hospital.  Dos otro a haya yudanza na Servicio di Emergencia na ImSan y despues por a bay bek cas.

   Pero e caso na Flamboyanstraat lamentablemente, e victima Suyari Petronia no tabatin ningun chens di haya yudanza, como cu el a fayece eynan mes.  E ta demostra tambe cu e dos personanan aki tabatin mente maligno y tabata den un ‘racha di tiramento’.  Pues ta cuanto caso mas recien di tiramento ta producto di nan mente diabolico.

   Di un banda, ta bon mes cu autoridad a pone man riba e hobennan aki cu ta wordo considera awor como personanan extremadamente peligroso.  Nan a demostra cu nan no tin cunes cu e bida di un ser humano.  Nan no ta worry cu nada.  Djis nan ta sinti nan mes ‘high’ cu nan tin un arma di candela den nan poder, y ta sinti cu ningun hende tin algo di bisa nan.

   E speranza tey cu Cuerpo di Recherche lo traha riba e caso aki cu tur precision necesario.  Ohala cu Dios ilumina e caminda pa asina nan traha rapportnan sin eror, y cu por haya sosten di Ministerio Publico pa asina investiga nan actonan detayadamente y ora cu nan yega dilanti Huez, cu lo exigi e castigo maximo cu ley ta permiti riba e isla.

   Un biaha mas, Cuerpo Policial ta haci suplica pa pueblo keda duna informacion.  Pa nan por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nan tipline na 111-41. Nan ta garantisa cu bo ta keda anonimo.