Parlamentario Clifford Heyliger:
ORANJESTAD (AAN): Prensa a reuni Diaranson mainta na sede di Utilities Aruba N.V., caminda Parlamentario Clifford Heyliger di Partido di Pueblo Aruba (AVP) a expresa su profundo preocupacion tocante e manera iresponsabel y sin transparencia cu ta maneha proyecto di renobacion di edificio Edward Cheung Centre for Innovation na Eagle.
Segun Heyliger, e proyecto cu originalmente tabata presupuesta pa un monto di 4 miyon Florin, awor ta costa un total di 16 miyon Florin – un incremento di cuater biaha mas cu loke a planifica. “No tabatin un business case, no tin proceso defini, no tin un obhetivo cla. Unda e otro 12 miyon a bay?,” Heyliger a pregunta enfaticamente.
E parlamentario a bisa cu durante e proceso di construccion, tabatin falta di control y supervision. “Cualkier contratista tabata por yega, ta worde instrui pa e director, ta cambia e trabao y sigui manda factura cu a worde paga sin cuestiona. Asina nos ta perde control di placa di pueblo,” Heyliger a splica.
Heyliger a enfatisa cu e 16 miyon Florin ta placa di gobierno, y como tal, placa di pueblo. El a recorda cu entre 2019 y 2023, Utilities Aruba N.V. a logra un total di 28.4 miyon Florin den dividend, pero ningun sen a bay back na gobierno. “Gobierno a sigui impone medida y gasto, mientras pueblo ta sinti presion den supermercado, den hardware store, den restaurant. Pero 28 miyon a disparce sin beneficio pa pueblo,” Heyliger a bisa. Y ainda e proyecto no ta cla.
E parlamentario a agrega cu e problema ta mas profundo. Segun Heyliger, e Hunta di Comisario di Utilities Aruba N.V. y su companianan, incluyendo WEB Aruba N.V., a faya den nan tarea di vigila y controla. “Na su luga nan a proteha nan mes, no a proteha interes di pueblo,” el a declara.
Heyliger a menciona cu despues cu gobierno a cambia, e hunta a ahusta statuut pa proteha nan posicion. “Esey ta sinberguensura. Tin comisario cu ta pensionado, pero kier siguridad di trabao, mientras hopi hende ta sin trabao. Nan kier mantene poder, cu consecuencia ta cu companianan publico no ta move den direccion cu mester,” Heyliger a agrega.
El a referi tambe na e caso di Aruba Renewable Energies (ARE), un compania cu Utilities Aruba N.V. a core lanta den otro intento di maniobra politico di parti di e gobiernonan di MEP, cu afortunadamente danki na e presion di sindicato, pa medio di un keho entrega na ministerio publico, a logra atrobe.
E intencion tabata pa saca WEB Aruba N.V. for di e wega di tur energia sostenibel y asina Utilities Aruba N.V. por a dicidi ken por strica placa na grandi riba custia di pueblo. Mientrastanto, WEB a perde siete aña di desaroyo den energia renobabel; nos ta papia di centenares di miyones di Florin cu Aruba por a spaar.
Heyliger a finalisa su declaracion cu un apelacion fuerte: “E pueblo a vota pa cambio y transparencia. E manipulacion pa medio di empresa estatal y nombramentonan politico tin cu stop. Si bo ta cu MEP, bo tin cu bay cu MEP; e institucionnan di pueblo no ta propiedad di partido. E cosnan cu ta pasa ta actonan di sinberguensura. Mi ta pidi pa investigacion y responsabilidad pa tur e gasto innecesario cu ta costa pueblo 16 miyon Florin.”
