Diaranson a registra accident basta fuerte riba Green Corridor

Hende herida den e dalmento

ORANJESTAD (AAN): Diferente yamada a drenta na Central di Polis, como tambe Centro di Alarma, pa indica cu riba Green Corridor na altura di Sero Tijshi tin un accident serio cu tres auto envolvi.

   Mesora Central di Polis a manda diferente unidad, incluyendo un patruya pa cera e rotonde na Kibaima pa e ruta rumbo pa Playa.

   Yegando na e caminda di Balashi pa Sero Tijshi, a bin topa cu e accident den cual tin 1 auto y 2 vehiculo envolvi, y a check cu tin 3 persona herida, uno tabata leve y e otro dosnan tabata poco mas serio.

   Specialista di Trafico tambe a yega mesora pa cuminsa compila tur dato posibel.

   E vehiculonan envolvi tabata un auto marca Honda Fit, un vehiculo marca  Lincoln MKX, y un vehiculo marca Honda Pilot.

   No ta conoci con exactamente e accidente a sosode, a mira cu e Honda Fit color roos cu number A-54268 tabata esun cu mas daño material. Den e auto compacto Honda Fit aki e dos hendenan mas herida tabata.

   E vehiculo Honda Pilot color cora kima cu number A-29211 su parti dilanti tambe a sufri hopi daño y tambe a nota cu e airbag nan a sali.

   E vehiculo Lincoln MKX color maron cu number A-24512 tambe tur airbag den e vehiculo a sali durante e impacto.

   En total dos unidad di Ambulans y dos Rapid-Responder a presenta pa duna asistencia na esnan herida.  Paramediconan a logra stabilisa e dos victimanan cu mas golpi, y na final a bay cu nan rumbo pa Hospital.

   Takelwagen mester a wordo usa pa kita e auto y e vehiculonan for di e caminda.