Di siman pasa un boto cu piscadonan di Aruba ta perdi riba lama

ORANJESTAD (AAN): Dialuna siman pasa, esta 17 di mei 2021 e Centro di Rescate y Coordinacion di Wardacosta a haya un yamada urgente di un famia.

   E famia a indica cu tin tres piscado, cual ta nan famia, y nan boto no

a regresa cas y cu nan lo ta perdi riba lama.

   E tres piscadonan a sali cas cu nan boto White Fish pa bay pisca y no a regresa. E famia di e piscadonan a tuma contacto cu Guardacosta di Caribe Hulandes pa haci un buskeda y rescate urgente pa nan famia riba lama.

  Guardacosta den un operacion pa haya e piscadonan a cordina un buskeda di algun dia cu e helicopter, e avion Dash-8 (riba potret) y un Metal Shark pa e buskeda y rescate di e piscadonan, pero no a logra haya nan.

   E operacion di buskeda y rescate di e piscadonan a ser traslada pa autoridadnan di Colombia pa e motibo cu ta sospecha cu e piscadonan a drif bay den e area di Search and Rescue cu ta cay bao di responsabilidad di Colombia.

   E autoridadnan di Colombia lo sigui cu e buskeda di e piscadonan y Guardacosta di Caribe Hulandes lo keda den contacto cu e autoridadnan pa keda na altura di cualkier informacion of noticia di e piscadornan perdi.

   TECNOLOGIA:

   Awor den Siglo 21, avance tecnologico a pone cu ta virtualmente imposible pa un boto perde awor riba cualkier skina di e planeta aki.  Ademas cu tin sistema di satelite di GPS cu ta hopi preciso, tambe tin algun aparato hopi chikito cu cualkier piscado por carga facilmente den nan boto of riba nan caya.

   Ademas cu nan tin un GPS Receiver pa mira unda nan locacion ta, ta vale la pena pa cumpra un “Personal Locator Beacon”.  E ta un aparato hopi chikito cu den caso di emergencia, bo ta primi un solo boton, y esaki ta manda un señal di emergencia cu ta manda mesora tambe bo coordinato di GPS.

   Un compania cu ta bende nan ta Garmin, cu tin e aparatonan di emergencia aki na color oranje (riba potret).  Ora bo primi e boton di emergencia, e señal urgente ey ta wordo ricibi pa e satelitenan di COSPAS SARSAT.  E satelitenan lo manda e señal pa e stacion receptor mas cerca.

   E stacion aki ta check e area, y mesora ta mande pa e autoridadnan di mas cerca.  Den e caso aki lo notifica RCC Center di Guardacosta di Caribe Hulandes na Curacao, cu asina ta start un mision di rescate.  Un aparato asina ta costa como $300 y por ta un parti valioso pa tur piscado, y doño di boto.