Caso serio den Parish Hillweg
ORANJESTAD (AAN): Tabata Diadomingo anochi laat banda di 11:50 pm, cu unidad di Polis di San Nicolas cu e momento ey tabata coriendo ta haci vigilancia banda di costa, y moviendo direccion panort riba Parish Hillweg rumbo pa Vader Piet, y na altura di un cas nan a mira un auto Toyota Mark-X color blanco para banda di caminda. Polis a mira un homber sinta tras di stuur, y tin un muher sinta riba asiento di pasahero.
Ora cu Polis a pasa banda di e auto pa sigui bay, un holor intenso y skerpi di marihuana a dal e agentenan! Esaki a pone Polisnan primi brake mesora, ya cu nan ta sospecha cu e hendenan den e auto aki tin droga den nan poder.
Polis a yega bek, a baha y cana bay na e auto. Yegando eynan, e agentenan a mira cu e bentana di banda di chauffeur ta habri. Mas nan yega cerca, mas fuerte e holor di marihuana a dal nan. E oficialnan a ripara tambe mesora cu e homber y e muher a bira nervioso.
Nan a cuminsa ta papia poco-poco tambe cu otro. Polisnan a mira claramente con e homber su wowo ta wak abao, y ta haciendo algo comosifuera e ta tratando di sconde algo. Polis mesora aki a ordena e homber pa e pone su mannan riba stuurwiel, y el a core haci esey tambe.
E homber di inicial H. a wordo puntra si e tin marihuana den su poder, y el a confirma esey. El a declara cu e hunto cu e muher di inicial M. a caba di dal un pito di marihuana. El a rek man y duna Polis e pito mitar huma di marihuana. Esaki mesora a wordo confisca.
Agentenan a puntra H. si acaso ainda e tin algo ilegal den e auto, di cual Polis mester wordo informa. El a bisa cu e no tin nada mas. Mientras Polis ta papiando cu e sospechoso, e oficial a mira cu tin un schoudertas preto banda di e asiento. Y cada rato por mira con e homber ta tratando di sconde e tas aki, door di keda pusha esaki cu su pia robez pa bay bao di asiento.
A base di esaki, Polis a duna e homber ordo pa e baha di e auto, y pa para pafo cu ambos man riba e auto. El a baha y cumpli cu esey. Ora di agente a bay gara e schoudertas preto aki, e oficial a ripara cu esaki ta abnormalmente basta pisa, y cu e zipper ta habri. Ora di bay rista den e tas, a bin haya un pistol di silver cu man preto. Tambe a haya un handschoen preto den e tas.
Esaki a pone cu automaticamente Polis a detene e homber H. y e muher M. como cu nan a viola Articulo 3 di Ley di Arma di Aruba, y Articulo 4 di Ley di Droga.
Polis a bay rista e ora mas den e auto blanco aki, y a haya un saco berde di haci compras bao di e asiento di chauffeur. E saco di compra aki tabatin un saco di plastico Ziplock conteniendo marihuana, un sakito di plastico transparente conteniendo substancia parecido na hasj, tambe un sakito di plastico transparente conteniendo un substansia roos cu ta parce Tusi of MDMA. A haya un balans color silver, y varios atributo pa usa droga.
Un caha conteniendo varios saco di plastico transparente yena cu papelnan di Florin di Aruba, y Dollars Mericano tambe a ser haya.
Ora di habri e Baul, a bin haya un caha di plastico color preto conteniendo un otro pistol color silver. Tambe a haya un patronchi cu varios municion den e caha.
Den e Baul tambe a haya un otro caha mas cu cantidad di municion. Esey a pone cu a informa e sospechosonan cu nan ta wordo deteni tambe pasobra a viola Articulo 3 y Articulo 11-C di Ley di Droga.
Tur e armanan, cu municion a wordo entrega na team forensico di BFTO, cu lo bay check si acaso e armanan aki a wordo usa den crimen recien. E droga hunto cu placa, y demas atributo a wordo entrega na Unit Narcotica di Polis cu lo bay sigui cu e investigacion.
Polis a confisca e Toyota Mark-X color blanco tambe, y cu Takelwagen a wordo hiba pa asina sigui cu e investigacion.
Ta parce comosifuera cu ta un dealer pisa di droga a wordo deteni aki.
