ORANJESTAD (AAN): Tabata Diasabra atardi cu personal di Tourism Security Patrol Aruba (TSPA) a yama Warda di Polis na Strandpolitie pa raporta un caso di ladronicia na Eagle Beach.
Ora cu Polis a yega na e beach, nan a papia cu e señora di inicial R. El a indica cu e kier haci denuncia di ladronicia. El a splica cu e atardi ey banda di 3:00 pm el a bay cu su amigo na e Eagle Beach na altura di Oceania Condominium. Nan a pone nan articulonan bao di un palo, y despues nan a bay den lama pa como 1 ora y mey.
Banda di 4:30 pm nan a sali for di lama y bay bek bao di palo, y tur cos ta bon ainda eybao sin problema. Despues di un rato nan a bolbe bay drenta lama.
Banda di 5:35 pm nan a sali bek for di lama, y aki e señora R. a mira un grupo di mucha muher banda di e palo di mata. El a mira cu un di e mucha muhernan den e grupo, tin un rugtas teni cual ta parecido na esun cu ta di nan. Despues e mucha muhernan a cana bay direccion panort.
Ora cu señora a yega bek na e palo di mata, nan a bin ripara cu nan articulonan a desaparece. Nan a check rond pa mira si acaso nan articulonan a wordo poni un otro lugar, pero a bin haya solamente un tas geel chikito, y algun articulo di beach.
Den e rugtas, señora R. tabatin un cartera maron cu su debit card, placa larga, y carchi di Biblioteca. Tambe e tabatin su yabi di cas, makeup, un smartphone Apple iPhone 13 color preto.
Su amigo tabatin un rugtas blauw di marca Oakley, conteniendo cartera maron, smartphone Apple iPhone 13 ProMax color berde, tambe un boter di awa. Den su cartera e tabatin 800 Florin, debit card, y algun carchi mas.
Aki ta unda cu nan a topa cu e Tourism Security Patrol Aruba, y a hala nan atencion, y asina a yama Polis.
Polis ta investigando e caso. Si acaso abo a mira kico a socede Diasabra atardi cu un grupo di mucha muher hortando articulo di hende na Eagle Beach, por fabor yama Tipline di Polis na 111-41 pa yuda resolve e ladronicia aki.
