ORANJESTAD (AAN): Diadomingo marduga banda di 4:45 am, Central di Polis a dirigi tanto Polisnan di Noord y di Oranjestad rumbo pa Olde Molen debi cu eynan tin un pelea y hendenan a tende tiro tambe.
Polis a ricibi tip mesora, cu e persona envolvi ta bisti cu un capuchon oranje/cora, y e ta esun cu tabatin un arma di candela den su poder.
E patruya di Polis di Noord cu a presenta prome na e lugar a mira rond, y nota un persona cu ta cuadra cu e descripcion suministra, y e ta para e momento ey na e loket di bende ticket, net na e entrada di Olde Molen.
Un poco despues, demas unidadnan di Polis a yega, y hunto cu mas agente nan a acerca e persona aki pa asina papia cune. Algo cu Polisnan a nota mesora, ta cu e persona aki cu capuchon oranje/cora aki ta tur na sudor.
Basa riba e informe cu a drenta, e agentenan a rista su curpa, pero no a haya nada den su poder. Despues Polis a puntre pa su nomber, y el a bisa cu su inicial ta L.
Na momento cu Polis tabata rista e homber cu capuchon oranje/cora, personal di Security di Olde Molen tambe a cuminza duna informacion na Polis. El a puntra Polisnan si acaso nan a haya un arma di candela den e homber su poder. Polisnan a bise cu no ahaya nada. Aki el a divulga cu e persona cu capuchon oranje/cora tabata envolvi den un pelea den e VIP-Section. Pesey nan a keda vigila e persona, pa asina ta sigur cu e ta bandona Olde Molen. El a sigui mira cu el a gana bay na un auto cu ta staciona banda pariba di Olde Molen. El a bisa cu lamentablemente e no sa ki marca of modelo e auto ta, pero el a bisa Polis pa bay check e smartphone di un persona eynan, pasobra el a saca potret di e auto.
A base di e informacion ricibi di Security y tambe mirando e potret, e agentenan a cana bay banda pariba y enberdad a bin topa cu un Toyota Vitz, color silver na banda panort di caminda. E auto no tin tinted windows, y tabata na lock. Riba e asiento patras, Polisnan cu flashlight por a mira un childseat, y bao di esey nan por a mira un tas chikito color preto. E forma cu e tas aki a wordo pusha bao di e childseat, y e informe cu nan ta acumulando, ta pone nan pensa cu e tas preto aki lo por tin un arma di candela.
Polis a percura pa keda vigila e auto Toyota Vitz mientras tanto. Diripiente Polis a mira un hoben canando cu carson khaki largo, cu lomba sunu. E tabata cana cu un T-shirt lora den su man drechi. Polisnan a nota cu e T-shirt aki ta tur mancha na sanger. Pesey agentenan a yega cerca y a puntr’e kico a pasa. E hoben tabatin un cap riba su cabez. El a declara cu el a djis sali cay, y su rudia tambe ta haci dolor.
Pa alrededor di 5:20 am, Polis a haya informacion cu e persona cu capuchon oranje/cora su nomber no ta di inicial L., pero su nomber di berdad ta M. Aki Polis pues ta observa cu e persona cu e capuchon oranje/cora lo a duna un nomber falso.
Polisnan a dicidi na confisca e Toyota Vitz, y a dicidi esey a base di tur hechos y circunstancia cu nan a topa cune eybao, y na interes di demas investigacion.
A contact Fiscal di Ministerio Publico, kende a duna aprobacion pa rista den e Toyota Vitz. Ora cu Polisnan a bay habri e auto y rista den esaki, a bin haya un revolver color maron hinca den e tas preto riba asiento patras. Esey ta e tas cu tabata pusha bao di e childseat.
Riba asiento dilanti banda robez, a bin haya un otro heuptas shinishi cu hoki di huls di proyectil cu contenido, tambe un smartphone di marca desconoci, un sker, un saco di plastico conteniendo marihuana, saconan cu puiro blanco parecido na cocaina, y saconan cu cada uno un piedra blanco aden.
E revolver color maron y e demas articulonan ariba menciona a worde confisca. Tur dos tas a wordo hiba pa Warda di Polis na Shaba, pa asina oficialnan forensico di BFTO y Unidad di Crimen Organiza pa mas investigacion.
Tambe nan a detene e homber M., esun mes cu capuchon oranje/cora, debi cu el a duna nomber falso y tambe cu a haya e arma di candela den su auto, y e ta wordo acusa di a viola Articulo 3:17 di Codigo Penal di Aruba, y Articulo 3 di Ley di Arma. E potret ta di archivo.
