ORANJESTAD (AAN): Desde cu e caso a socede Dialuna 26 di December riba e parkinglot den Werfstraat, net pariba di salida di waf di crusero, cu autoridadnan a cuminza ta busca informacion di e maltrato severo aki riba un pareha turista.
E pareha inocente cu a yega Aruba abordo di e barco di Royal Caribbean International, esta ‘Voyager of the Seas’ cu a yega e isla pa 8:00 am y tabatin planea pa
bandona e isla pa 11:00 pm.
Den oranan di atardi nan a planea di huur un auto, pa asina core un poco rond di Aruba y conoce di cerca. Nan a wordo avisa cu e auto di huur ta staciona den e parkinglot grandi den Werfstraat, pues esun cu tin patras di e edificio di Diamond International.
Aki ta unda cu e turista masculino a wordo maltrata na un forma masha violento mes door di tres persona, combina cu golpi di impacto grandi contra su cara, cu a lage cu varios trauma y bolombonchi na su curpa. Tur e maltrato aki den presencia di su casa y tres yiunan.
Recherche di Oranjestad a keda encarga cu e trabao pa asina purba haya sa kende e 3 delincuentenan aki ta, di cual uno ta un muher.
E experticio di e oficialnan hudicial di Recherche aki, a pone cu na un forma rapido a bin riba pista, y mesora a cuminza sigui rasto di algun sospechoso.
Ni 4 dia despues, esta Diabierna 30 di December e prome detencion a cay na un cas na Pos Chiquito caminda un muher a worde deteni. Na e cas aki tambe un auto a worde confisca relaciona cu e agresion fisico pisa cometi den Werfstraat.
Cu e muher deteni y aki a cuminza interoge sin stop, a pone cu mas detaye a drenta.
Y net riba Dialuna 2 di Januari, Recherche di Oranjestad a yega na un cas na Jan Fleming y aki e di dos sospechoso cu ta e homber di incialnan T.E.A.B. di 24 aña naci na Aruba.
Cu dos persona deteni, a sigui traha sin stop riba e caso, y finalmente riba Diaranson merdia pa atardi, Recherche di Playa a detene e di tres sospechoso na mesun cas na Jan Fleming. Ta trata di e homber inicialnan C.M.E.B. di 21 aña naci na Aruba.
Mesora e sospechoso a worde hiba Warda di Polis pendiente di mas investigacion.
Segun vocero policial Liliana Rasmijn, e funcionarionan hudicial di Cuerpo Policial a traha incansablemente pa resolve e caso aki. Nan a demostra cu como Cuerpo Policial, nan no ta tolera cu es unico pilar economico worde perhudica pa un par di persona cu ta comete fechorianan asina aki. Tur turista mester sinti nan mes safe ora e bin pasa su vacacion na Aruba.
