Segun Lito Laclé, President di SPA:
ORANJESTAD (AAN) President di Sindicato di Polis (SPA), señor Lito Laclé, a referi tambe na e situacion di Departamento di Recherche, cu a haya algun solucion riba mesa, den reunion cu Mando Policial hunto cu SPA.
Lito Laclé a subraya cu ta hop cla cu e personal a bin cien porciento afo, den busca di nan derechonan, pasobra nan a haya reduccion di personal, y nan a bati alarma tur caminda, debi cu nan no a haya atencion, pero ora cu nan a reuni cu Mando Policial conhuntamente cu SPA, eynan a bin cierto solucion riba mesa, por ehemplo pa loke ta recherche di Strand Politie, cu entre otro, a logra refuerzo pa Noord y Santa Cruz, y awo vacaturenan a habri pa solicita pa recherche.
Laclé a expresa cu tin pregunta cu mester bay pa gobierno, manera kico a pone un banda pa Cuerpo Policial, kico ta e prioridadnan di KPA, si tin tekort (scarcedad) den personal, si ta berdad a corta 10% den e presupuesto di Minister di Husticia, entre otro asuntonan.
El a señala tambe cu ora el a papia cu presidente di Parlamento, e ta conclui cu no por culpa gobierno so, pero oposicion tambe. El a splica cu nan no tin un solo presupuesto pa KPA, pero pa husticia en general, y esey pa SPA no ta claro, y ta bin for di añanan atras caba.
Encuanto e bon di cuminda cu a wordo kita for di polis, presidente di SPA a atende esaki cu Mando Policial, pasobra na 2020 a yega na un areglo cu gobierno di Aruba y tambe cu DRH, cu no por kit’e for di polis y otronan si ta cobre. Dos siman despues cu el a manda un nota pa Mando Policial, el a trek esaki y tur cos ta canando normal bek.
Lito Laclé a subraya cu nan tur tin cu pone schouder bao di husticia, pasobra si no inverti den siguridad, cu ta husticia, y si nan no tin e material necesario pa haci investigacion nan no por haci’e.
